ORANJESTAD (AAN): Entrante 1 di Juli proximo Cruz Cora ta bay stop cu e programa di pakete di cuminda pero Gobierno ta bay tuma esaki over.
Asina Prome Minister Evelyn Wever-Croes a reitera durante su programa Live cu Tanchi Eve.
Gobierno ta bay haci uzo di Fundacion Pa Nos Comunidad, entre otro y Cruz Cora tambe lo yuda, pero e no ta bay concentra na Cruz Cora mas, pero na gobierno di Aruba, a splica.
Gobierno ta bay haya placa di Hulanda pa 3 luna cu no mester paga bek. Despues di esey, Aruba lo mester hacie riba su mes pero Hulanda ta dispuesto pa fia e placa na un interes reduci, Wever-Croes a indica.
E mandatario a agrega cu gobierno di Aruba ta bay carga henter e proyecto di pakete di cuminda di Cruz Cora di esnan cu ta bin na remarca pe.
El a laga sa cu probablemente ta bay tin mester di bay registra di nobo. Durante e cambio di luna cu ta bin, di Mei pa Juni, ta bay percura pa duna informacion y pa no cay den bashi.
Mesora cu Rode Kruis pasa e proyecto pa gobierno, tur hende cu tabata hay'e por sigui hay'e.
Keda pendiente pasobra lo bin cu mas informacion riba si mester bolbe aplica, na unda y kico ta e rekisitonan, etc.
