E barconan envolvi den e operacionnan ta bonbini na Corsou
*Presencia di unidadnan mericano den region ta cuadra cu practicanan di existente
*Parlamentario Tevreden (MEP) cu preguntanan na Eman
ORANJESTAD (AAN): Por a mira cu Gobierno di Corsou a emiti un comunicado di prensa riba diaranson 20 di augustus. Conseho di Minister a keda informa tocante e situacion actual di seguridad. Motibo di e reunion aki tabata e anuncio tocante intensificacion di e unidadnan mericano den Caribe.
E informacion a keda duna na Conseho di Minister door di Comandante di Marina Real di Hulanda den Caribe, Comandante Walter Hansen, y director di ‘Servisio Nashonal di Seguridat’ (VDC), sr. Jérôme Beeldsnijder. Como departamento di Reino Hulandes, Ministerio di Defensa ta encarga cu defensa den Reino, incluyendo e parti Caribense di Reino.
E motibonan menciona door di gobierno Mericano pa desplega personal y recursonan, ta pa intensifica e operacionnan contra narcotrafico.
E barconan envolvi den e operacionnan aki pues ta bonbini na Corsou pa, manera ta custumber, abastece nan suministro, incluyendo combustibel. E presencia di unidadnan mericano den nos region ta cuadra cu practicanan di trabou existente entre nos paisnan.
E Forward Operating Location (FOL) caminda Hulanda, Merca y Corsou ta colabora hunto riba operacionnan contra narcotrafico den nos region, ta un ehempel di esaki.
E relato na Conseho di Minister a tuma luga riba peticion di Prome Minister Pisas. Gobierno di Corsou ta sigui vigila e situacion, como cu seguridad di nos pais ta primordial. Asina e comunicado tabata bisa.
Mientrastanto, na Aruba, Gabinete AVP-Futuro no a saca nada oficial, pero si ta mira cu algun parlamentario manera Hendrik Tevreden, diaranson a probecha pa referi na e tema aki y a bisa “E situacion ta uno serio, nos no por descarta nada. Ayera mi a entrega preguntanan na Minister President Eman tocante e situacion entre USA y Venezuela”.
Lo ta na su luga pa Gobierno di Aruba expone na comunidad kico ta nan posicion pa asina tur hende ta trankil y sa kico precis ta pasando rond di Aruba.
