ORANJESTAD (AAN): Despues di mas di un luna cu e Boeing 747-300M a ateriza na Aruba cu un cargamento di casi 800.000 Dollar di cigaria di marca Ibiza King Size, y Ibiza Short,
awor numa Gobierno di Aruba a reacciona y a informa cu e avion ey awor ta poni riba blacklist, y no por bin Aruba mas.
E Boeing 747 aki ta pertenece na regimen di Nicolas Maduro, y a worde bautiza cu e nomber “Luisa Caceres de Arismendi”, cu matricula YV-3531. E ta un compania cu Gobierno di Caracas a crea specialmente pa transporta carga, y a pushe bao cocodek di Conviasa.
E avion a ateriza na Aruba riba Dialuna 16 di Mei 2022 cu un total di 18 persona abordo. Siendo cu normal un avion di carga tin 6 pa 7 miembro di tripulacion so. Lo mas sorprendente, di e 18 persona aki un total di 7 tabata homber Irani, y 11 tabata Venezolano.
El a yega Aruba procedente di Paraguay cu carga di cigaria di e compania Tabalesa. Manera DIARIO a splica caba, e tempo ey ningun musca a bula, ni alarma a worde bati cu tin asina hopi Irani abordo.
E Boeing 747-300M aki tabata pertenece antes na Mahan Air di Iran, cu ta riba radar di Gobierno di Washington, como cu e ta worde considera como colaborador di regimen di Tehran den e respaldo logistico di actividadnan terorista. Y awor cu e avion di Cargo ta bulando bao bandera venezolano, e ta sigui comete iregularidadnan durante vuelo, door di e.o. paga su sistema di ADS-B (paga su visibilidad pa radar).
Gobierno Venezolano a dune e nomber ‘Emtrasur’, y Nicolas Maduro cada rato cu e haya chens, ta alaba Emtrasur y ta mustrando cu e ta e orguyo di su Gobierno.
Otro paisnan a cuminza bira nervioso cu cada rato e avion aki ta baha na nan pais, y tin asina hopi Irani abordo. Den fin di Mei y comienzo di Juni, e avion a bula e.o. pa Tehran, y tabata bula tin biaha riba Lama Caspio y diripiente ta "paga" e radar bulando na 37.000 pia riba Azerbayjan, tambe a mire ta Moscu, y despues bula pa Iran, sigui pa Belgrado. Despues el a bula pasa den area di Portugal y aki atrobe a 'paga' e sistema di ADS-B pa e no worde detecta. Pero el a ateriza na Caracas cu un cargamento di vacuna. Nan a mire cu el a bula tambe pa Mexico.
Autoridad di aviacion civil na Paraguay (DINAC) a dune e beneficio di duda, y a autoriza Emtrasur pa haci e vuelo no-regular di carga for di Venezuela pa Ciudad del Este, y despues a mustra cu e vuelo ta sali rumbo Aruba.
Ora cu el a yega Paraguay riba Diabierna 13 di Mei 2022, a bin descubri cu abordo tabatin 18 miembro di tripulacion, pues 7 hende di Iran, y 11 hende di Venezuela. Esey ta algo cu a hala atencion di autoridadnan na Paraguay, y pesey nan a ordena Departamento di SENAD bay haci un extra control riba e mercancia cu ta bayendo awor pa e Jumbo Jet rumbo pa Aruba. Ta trata aki di un cargamento di sigaria, cu ta bin di e compania Tabacalera del Este S.A., conoci eynan como 'Tabesa'.
Despues di Aruba, den simannan cu a sigui, e avion a bira manera un orguyo di Venezuela, y a worde usa door di Caracas pa manda 30 ton di remedi y material medico pa Suriname pa e crisis di inundacion. Despues nan a cuminza tuma trabao di transporte di kico cu ta, incluyendo pieza di auto.
Pero e presencia di e Jumbo Jet di Emtrasur a cuminza haci paisnan den Sur America hopi mas nervioso. E situacion a escala, y awor e Boeing 737-300M aki ta 'pega' na Aeropuerto di Buenos Aires, sin cu e tin chens di haya jetfuel di companianan na Argentina pa por bay Venezuela back. Y pa colmo e no mag di drenta espacio aereo di Uruguay tampoco pa bay yena jetfuel eynan. Esaki a pone cu Caracas a hasta acusa Uruguay cu a trece e avion y tripulantenan den peligro.
Tur dos compania na Argentina cu ta suministra Jetfuel, esta Shell Oil S.A. y tambe YPF S.A. a nenga di bende nan Jetfuel, y esey debi na e alertanan internacional y sabiendo cu tin sancion di Merca imponi riba companianan Venezolano.
Debi na esaki, awor autoridadnan na Argentina a prohibi e tripulantenan di subi Aeropuerto y bay na nan avion. For di e dia ey nan ta aloha den un Hotel cerca di Aeropuerto, sperando un decision oficial. Nan mag di bandona Argentina abordo di cualkier linea aereo, pero ta prohibi di subi e avion di Emtrasur. Pues ainda e avion aki ta stagna na Argentina.
Riba Diabierna mainta, oficialmente Ministerio di Ministro Ursell Arends a reacciona riba e asunto di avion Emtrasur aki.
Gobierno di Aruba a bisa cu nan a tuma nota di publicacionnan tocante un vuelo recien di e compania Emtrasur pa Argentina. E compania aki tambe a efectua un vuelo di cargo pa Aruba dia 16 di mei 2022. A base di loke a pasa na Argentina a dicidi cu no lo duna e compania aki permiso mas te ora cu tin mas claridad riba e alegacionnan treci dilanti. E autoridadnan concerni na Aruba ta bezig ta colectando mas informacion tocante e caso for di instancianan (internacional) concerni y a base di esaki lo tuma un decision final.
