ORANJESTAD (AAN) – Minister Presidente a acentua, den conferencia di prensa dialuna mainta, cu ora e ta papia di recuperacion e ta referi na recuperacion economico y tambe di salud mental, di e poblacion.
E dignatario a señala cu e pandemia di Covid-19 y tur e medidanan cu a bin cune, a ocasiona hopi presion den e salud mental di tur e ciudadanonan.
“Nos a reuni cu Respaldo, AZV y DVG, siman pasa, y nos a encarga nan pa bin cu un crisis plan, con nos ta bay traha riba e salud mental di nos poblacion, y den e dianan aki nos mester ricibi e crisis plan, y nos lo zorg pa tin e fondonan disponible, pa asina hunto cu Respaldo, AZV, DVG y otro stakeholders riba e tereno aki nos por traha pa trece e trankilidad tambe, pa loke ta trata e salud mental di nos comunidad”, Minister Presidente a bisa.
