Minister Presidente ta duna di conoce:
*Tur departamento ta bay comunica y haya informacion di otro
ORANJESTAD (AAN) – Minister Presidente Evelyn Wever-Croes, den entrevista cu DIARIO a indica cu Gobierno a haya fondo, aloca for di Union Europeo y nan lo cuminza drenta den e di tres cuartal, kiermen den e cuartal aki, cu ta den curso.
“E prome fondonan ta bay wordo aloca riba ‘project management’ pasobra nos mester apunta hende cu ta bay trek e proyecto. Den esaki nos ta ainda bezig cu Estonia, cu ta un pais hopi desaroya riba e tereno aki. Nan ta bay yuda nos cu e project management desde ayanan, anto cu un grupo local tambe pa trek e proyecto”, e dignatario a duna di conoce.
ID DIGITAL:
Prome Minister a splica cu gobierno a cuminza cu e parti di ID digital. “Ya caba tin un decision di gobierno pa locual ta bira e number unico. Bo mester un number unico pasobra mester di un number unda bo ta bay acopla tur informacion. Y esey tin un proposicion p’e pa un number unico nacional: nup number. Anto, a base di esey por bay traha riba un ID digital, pasobra esey ta locual nos mester pa tur hende”, Premier Wever-Croes a bisa.
Tambe e ora ey por haci mas pagonan digital na Aruba, cu no ta ainda den tur e posibilidadnan cu nos tin, segun e mandatario.
“Esey ta nos puntonan di prioridad aworaki, den e kwartaal aki, mientras cu ta bay prepara e proceso di digitaliza e procesonan den e departamentonan cu tin cu bay comunica cu otro, manera cu Censo, DIMAS, Belasting, Cuerpo Policial, y nos tin un par di departamento cu a wordo scogi caba, cu nan informacionnan mester bay comunica cu otro, unda cu, cu number unico bo ta ay acopla tur informacion”, e dignatario a relata.
Prome Minister a expresa cu esey no kiermen cu na Censo, un trahado ta bay haya tur informacion di DIMAS. “Bo mester pone cierto nivelnan di seguridad y autorizacion, pero loke si bo ta logra ta un caminda central unda bo tin tur informacion di e persona concerni, y esey ta locual nos mester na final di dia”, e mandatario a splica.
Esey ta nifica cu si un hende ta bay for di Aruba, e informacion tin cu bay di biaha pa DIMAS y pa Belasting; si un hende fayece tin cu bay belasting inmediatamente. Minister Presidente a agrega cu cosnan asina, cu ya caba ta sosodiendo, pero na un speed mas halto anto pa mas departamento bay riba dje.
