ORANJESTAD (AAN): Diaranson awor, 10 di Augustus 2022 ta e fecha cu prijs di gasolin na Aruba lo conoci un prijs nobo.
Siguiendo e trend regional, tur cos ta mustra cu e lo bay baha na Aruba tambe proporcionalmente bastante.
Manera ta conoci, luna pasa pueblo a haya un shock ora cu prijs di gasolin a subi cu 14,5 cent pa liter, pa asina yega na e tarifa record di 335,7 cent pa liter.
Prijs di Diesel LS a subi cu 22,4 cent, pa el a bira 312,7 cent pa liter.
Prijs di crudo: Luna pasa ora cu e prijs di gasolin a subi na Aruba, tabata mesun siman ora cu prijs di crudo (WTI Crude Oil) a baha for di $102 pa bari, y cay te na $96 pa bari.
Na comienzo di Juli, e mesun crudo aki tabata casi $105 pa bari. Analistanan ta mira cu demanda pa combustible ta cayendo, y esaki ta pone cu e prijs pa crudo tambe ta sigui e mesun rumbo.
Den fin di siman di 6 y 7 di Augustus, prijs di crudo pa bari di WTI Crude Oil a sigui baha y awor ta na $89 pa bari.
Tin algun isla den Caribe unda prijs di gasolin keto bay ta halto. Na Barbados mes, Gasolin Unleaded ta wordo bendi na 421,5 cent (Florin) pa liter (como US$ 2,33 pa liter). Na Republica Dominicana e prijs pa Gasolin a keda mescos desde prome cu April caba, como cu Gobierno a freeze e prijs y ta subsidiando esaki pa publico keda paga solamente 256,8 cent (Florin) pa liter (como US$ 1.42 pa liter).
Te Diamars 9 di Augustus pa 12:00 pm, Gobierno lo anuncia kico e prijs nobo di Gasolin lo bira na Aruba.