ORANJESTAD (AAN) – Garreth Tromp, Epidemiologo di Departamento di Salud (DVG), a señala den conferencia di prensa tocante Covid-19, Diahuebs anochi,
cu otro aspecto importante, cu mester tin den consideracion, ta cu den e ola di omicron, mas frecuentemente, e personanan cu a wordo interna tabata tin covid-19 y no pa via di dje.
Esaki ta un tendencia cu na e momentonan aki ta mas of menos ta 60% via di Covid y 40% cu Covid; como ehemplo, un hende muher na estado.
Garreth Tromp a indica tambe cu durante e periodo di Delta, esaki tabata net diferente. Por a mira cu un 80%, mas of menos, di personanan hospitaliza tabata pa via di covid y 20% no pa su via. Esaki ta trece e corelacion mucho menos fuerte na e momentonan aki.
E importancia di e mensahe ta, Tromp a reitera, cu personanan di edad halto cu no a tuma e 'booster-shot', tum'e, mescos cu pashentnan cu malesanan cronico, pasobra covid por hisa nan chens di wordo hospitaliza na Cuido Intensivo of cu por fayece.
Tambe, e persona cu a haya covid-19 recientemente, e ta bon proteha pero aki un par di luna e efecto di e proteccion tambe ta baha, y ta importante pa tuma e booster. Y pa e personanan cu no ta di e criterio aki, preveni pa nan no wordo contagia, y preferible pa tuma e dos prome vacunanan y e 'booster-shot' tambe.
