Prome Minister Eman:
ORANJESTAD (AAN): Diaranson, Parlamento di Aruba a trata e Presupuesto Supletorio di Gobierno. Ministernan di Gabinete AVP-FUTURO, cumpliendo cu nan responsabilidad, a contesta preguntanan cu diferente miembro di Parlamento a dirigi na cada un di nan, relaciona cu nan maneho desde cu a forma Gobierno.
Prome Minister mr. Mike Eman, como minister encarga cu Asunto General, Naturalesa y Cultura, a duna un splicacion amplio di su maneho y e direccion den cual Gabinete AVP-Futuro kier hiba Aruba aden. Esaki ta cuadra cu e linea di pensamento di e raport di Sociaal Economische Raad SER “Naar Brede Welvaart op Aruba: Van groei naar balans”, den cual ta confirma e linea di maneho di Gabinete AVP-Futuro. Den e raport, SER ta trece e preocupacion di con e prosperidad di Pais Aruba no tabata bon reparti cu comunidad. E crecemento di nos Economia no tabata traduci automaticamente den bienestar pa comunidad.
A pesar di e desaroyo economico, costo di bida a keda aumenta, e poder di compra a keda bay atras, scolnan a deteriora, nos barionan a deteriora y asina Aruba a keda bay atras, pensionadonan a keda lubida, cuido medico a mira recorte inhumano mientras un grupo so tabata probecha di e desaroyo den turismo. Ta netamente e situacion inhusto aki a sirbi como inspiracion pa e slogan di “Bolter Cos”.
Gabinete AVP-FUTURO a pone como punto di prioridad pa conecta e desaroyo cu comunidad, pa mehora e poder di compra, pa drecha e situacion di nos grandinan, pa trece bienestar den tur cas y pa tur hende den tur sector y di tur edad.
Apenas na inicio di Gabinete AVP-FUTURO, a duna un aumento di 250 florin di reparatietoeslag pa tur pensionado, cual a yega cerca riba 22 mil pensionado. Ademas a reduci e accijns riba prijs di gasoline pa yuda mitiga e aumento di prijs di producto causa pa factornan internacional, pero tambe a expande e lista positivo cu Gobierno anterior a corto sin escrupulo. E decisionnan aki ta parti di e esfuersonan pa mehora e situacion financiero den cada hogar di forma inmediato.
Gobierno den algun luna, a haci inversion di 43 miyon pa e aumento di reparatietoeslag, a aloca 30 miyon pa inversion, a pone 10 miyon pa subsidia e reduccion di accijns riba gasolin, 2.3 miyon pa renobacion di De Vuyst Complex, 2.7 miyon pa Bushiri Complex, 3.1 miyon pa MFA San Nicolas, 4 miyon pa Beatrix School. 5.5 miyon pa renobacion di Arubahuis na Hulanda, 200 mil pa renoba e compleho di Shelter, 300 mil pa Animal Control Center, 1 miyon pa renobacion di Scol di Polis Watty Vos y asina tin un cantidad di otro inversion cu lo tuma luga den e periodo nos dilanti.
E compromiso di e Gobierno aki ta pa percura pa tur hende riba e baranca aki, por ta parti di e desaroyo y por hiba un bida digno cu nan merece.
