SANTO DOMINGO: Aña nobo a habri, cu e informacion lamentable cu e empresario Julio Brache Arzeno,
kende ta fundador di lechi y juicenan Rica na Republica Dominicana, a fayece cu 96 aña di edad.
Julio ta oficialmente ainda e ‘president ad vitam’ di e Conseho di Administracion di Grupo Rica. Dialuna mes, e directiva y demas gerencia di Grupo Rica a manda palabranan di condolencia na famianan, uniendo nan mes na dolor pa baymento di nan fundador.
Brache a nace na municipio di Moca di provincia Espaillat na 1927. Aunke durante su bida el a destaca como empresario, su profesion di berdad tabata den medicina. Riba e website di Grupo Rica, ta indica cu Brache tabata e prome director di Hospital Moscoso Puello for di 1956 te cu 1959. Tambe el a fungi como ciruhano di Hospital de la Aviacion Militar Dominicana for di 1956 te cu 1969.
Desde 1964 el a cuminsa traha como medico ciruhano na Hospital Salvador B. Gautier, di cual el a renuncia na 1969 pa dedica su mes na administracion general di e compania Pasteurizadora Rica.
E capital inicial pa cuminsa como productor di leche tabata 1.200 pesos, pasobra cada baca a costa 200 pesos. El a compra nan na Rio San Juan, y a trece nan Santo Domingo pa nan biba riba algun tereno cu e welo di su casa tabatin banda di caretera Sanchez.
Tur dia prome cu e bay Hospital, e tabata haci trabao di ganadero y pasa recoge lechi pa despues bende nan entre bisiñanan. Na 1965 e cantidad di baca cu e tabatin a subi te na sesenta y e famia a busca tereno mas grandi na Villa Mella.
Rica a haci historia tambe door di bira e prome empresa Dominicano cu a participa den mercado di balor, pa asina e famianan Dominicano por a construi patrimonio y genera placa di spaar via un inversion cu a yuda nan cuminsa produci productonan di lechi y tambe juice di calidad halto.
Den 56 aña di historia di Grupo Rica, Brache a haye ta negosha y tende reclamo di ganaderonan, agricultornan, y lidia cu controlnan estricto riba prijs y lechi di mal calidad, of esnan cu a wordo modifica.
Den esey tambe tin competencianan infiel, intentonan di sabotahe, y plaganan cu a caba cu produccionnan completo.
