Gino Frans, director: *Mientras edad ta bahando hopi
ORANJESTAD (AAN) – Den entrevista cu DIARIO, señor Gino Frans, Director di Fundacion Eliezer, a comenta cu nada nobo a sosode, pa loke ta e situacion di e adictonan. Tur cos a keda mescos, e sistema no a cambia, nan a papia hopi, hasta a GRITA pa auxilio, pa yuda e personanan aki, “pero e no ta bay…”
Tambe traha sin fondonan ta algo dificil pa haci. E fundacion ta haci lo maximo cu e por, pero nan mester di ayudo tambe.
El a duna di conoce cu Fundacion Eliecer a acerca Fundacion Rancho pa nan traha hunto, pasobra union ta haci forza. Y e ta kere cu nan mester gobierno y esnan concerni mester acudi cu e Fundacionnan aki. Pero nan mester di placa pa nan por haci nan trabao.
Gino Frans a señala cu tin hopi adicto riba caya cu no ta haya ayudo. Lamentablemente e fundacion kier saca nan for di caminda, pero ta duro pa nan hinca un cas cu yen di hende. El a menciona edificionan bashi cu tin unda e adictonan ta drenta acumula, huma eyden, destrui e lugarnan y asina ta bay sigui, pasobra e cantidad di adictonan ta aumenta y ta busca unda pa bay sconde.
Frans a remarca cu esey ta un problema grandi cu tin na Aruba, y e ta kere cu mester cera cabes hunto pa gara e toro na su cacho y cuminza yuda e adictonan.
Edad di adictonan a baha hopi. Gino Frans a indica cu esnan den edad grandi ta drenta un lugar di hende grandi y ta stop di droga, of ta fayece. Pero duro y tristo ta di wak adictonan hoben den caya. E asunto aki ta mescos cu un storia sin final.
Nan ta pidi pa gobierno duna algo sikiera: awa, coriente, cuminda. E dos fundacion aki ta traha di curazon, pero nan no tin fondo, Gino Frans a reitera. Comerciantenan cu kier saca un man pa yuda nan, ta bon bini. Cu ayudo nan por haci hopi, pero mester di placa. E adictonan no mester solamente baña, drumi, come, pero tambe training, pa wordo prepara pa bay traha bek. Tanto bal yuda un hende y despues habri porta lague bay sin un nachtzorg, sin busca un trabao pe. Ta mescos cu hiba awa lama. Sin tin hende cu kier yuda, si gobierno ta yuda, lo tin menos ladronicia, atraco, vandalismo, pasobra aworaki mester bay hinca placa den e lugarnan cu nan a kibra, anto miho hinca placa den e rehabilitacion di e adictonan aki.
