No obstante cu donacion di material ta nan meta:
*Tur cos ta wordo registra den nan base di dato
ORANJESTAD (AAN) – Gabriel Marchena, Trahador Social di Fundacion Pa Nos Comunidad (FPNC), a agrega den entrevista cu DIARIO, cu schoolgeld no ta algo cu normalmente e fundacion ta haya pa yuda esnan den necesidad.
Pero si nan ta haya donacion en efectivo, FPNC tambe ta haci uso di dje pa cumpra uniform di scol. Nan no ta limita nan mes den e aspecto aki.
“Primordialmente, e peticion ta bin mas tanto aworaki pa articulonan di scol. Schoolgeld mi ta kere cu, di un of otro manera, por yuda den nan network pero pa mi e parti di material di scol, uniform vooral, e tas di scol, material di scol (en general), nos tur sa cu esaki a subi di prijs drasticamente, y nos ta ripara cu mayornan tambe ta sintie, specialmente den famianan cu tin un entrada menos cu minimum loon, por ripara cu esaki no ta bay yega, teniendo na cuenta e grandura di cada constelacion. Tin famia cu ta mas grandi cu otro y tin mas mucha den cas. Esaki kiermen cu tin cu cumpra mas material di scol y uniform ta hopi importante”, Marchena a señala.
El a reitera cu donacion di placa tambe por wordo haci pa medio di un transferencia via cuenta di banco di FPNC na Aruba Bank. E fundacion tin experiencia caba con pa haci esaki, Gabriel Marchena a subraya. “E ta un proyecto hopi conoci pa nos, nos sa con pa draai e proyecto, y na e forma aki nos sa tambe cu e ayudo ta bay yega na e persona corecto”, el a indica.
E ayudo ta bin hopi biaha via peticion, melding di otro instancia cu FPNC ta traha cu ne, manera Departamento di Asunto Social, FCCA, WGK, entre otro, y nan ta registra e peticion den e fundacion su data base. E ta gradici e comunidad di Aruba cu semper ta respalda e Fundacion den diferente proyecto, y 'back to school' no ta e excepcion.
“Proyectonan pa mucha, mi ta kere semper ta touch curazon di hende, y nan ta yuda masalmente. Nos ta hopi gradici pa e diferente sponsors cu nos tabata tin den pasado y awo, y cualkier persona individual, of famia cu kier yuda, nan ta bon bini”, Gabriel Marchena a señala.
