ORANJESTAD (AAN): E invasion di yerba di lama tipo ‘Sargassum’ a ta spulando na costa di varios isla y pais den Caribe ultimo lunanan.
Cientificonan cu tabata sigui nan movimento, a nota cu pa 2021 e cantidad di Sargassum riba Oceano Atlantico ta mas grandi cu nunca.
E lo bay bira algo cu tin di costumbra cune, como cu esaki tambe a bira un ‘normal nobo’. Via di satelite, cientificonan ta track e movimento di aglomeracion grandi di e yerba di lama color maron aki riba Oceano Atlantico como tambe Lama Caribe. Na otro paisnan, e yerba di lama aki a invadi beachnan, causando un molester pa cu medio ambiente.
Esaki no tabatey antes, y cientificonan ta pensando, cu e quimica di oceano a cambia pa asina e yerba di lama aki crece asina hopi. E yerba aki ta un tipo di macro alga y e especie aki ta crece specialmente den oceanonan cu awa cayente, y hopi biaha ta ser haya den cercania di lama cu no ta hundo y tambe rifnan di coral.
Na Aruba semper el a spula na costa panort di e isla, unda algun caminda e ta yega y keda na tera. Sinembargo como cu Aruba no tin e bahianan cu ta bay paden (manera Curacao y Bonaire si tin), e ora lama mes lo sigui spula y manda e Sargassum aki mas leu y despues full e area aki ta keda relativamente limpi.
Toch lo tin di bay haci uso di heavy equipment pa kita algun di nan cu ta spula y keda na tera, unda despues nan ta putri y produci un holor hopi desagradable.
Mientras tanto na Republica Dominicana e ultimo simannan aki tin dolor di cabez cu nan. Un cantidad sin precedente di Sargassum a invadi parti di e bunita beachnan blanco y awa cristalino cu tin na e pais di Merengue, net awor cu Turismo eynan ta den proceso di recupera.
Pa varios siman caba e alga aki a bin ta spula na costa di Republica Dominicana, y e biaha aki hasta na lugarnan unda e no tabata socede antes.
Cu hark den man, decenas di homber ta traha bao di e solo fuerte na e beach di Cortecito na Punta Cana, pa asina kita e Sargassum y haci e playa bek limpi. E yerba marron a yega diripiente y den un cantidad cu nunca antes nan a yega di mira. Entre e trahadornan tin hopi Haitiano cu a wordo contrata pa yuda kita Sargassum for di riba beach.
Cada rato nan ta yena garetia yen-yen di Sargassum, y ocho ora largo cada dia nan ta haci esey. E Hotel cu nan ta trahando pe ta paga nan 10,70 Dollar pa dia.
Pero e aña aki por a nota mucho mas hopi Sargassum compara cu pasado. E fenomeno aki cu ta afecta casi tur beach den Caribe, specialmente den zomer ta socede net ora cu turismo a cuminza hisa cabez poco-poco na islanan den Caribe cu a sufri hopi di e pandemia.
Den pasado, Sargassum tabata yega na costa na un forma hopi racional, suave, y e tabata manehable. Pero awor ta mira algo diferente cu e Sargassum aki cu mas bien ta perhudicando varios isla. Turistanan ta yega e isla y ta keda desapunta pa mira un beach asina sushi cu yerba.
Pero no ta e beach so, e lama na oriya tambe ta sushi. Bo no kier ni cana den dje, y esaki ta dal Deporte Aquatico tambe masha duro den zonanan turistico.
E ta pone cu turistanan ta buscando otro lugar unda no tin problema cu Sargassum.
Hotelnan na beachnan afecta ta kehando cu nan no ta hayando hopi sosten di Gobierno tampoco pa soluciona e situacion.
Varios Hotel a hasta instala algun barera anti-Sargassum temporal pa evita cu e yerba marron aki ta yega cerca of subi beach. Pero e maltempo di Tormenta Tropical Grace cu a pasa, a kibra varios barera y a spula mas hopi yerba ainda riba tera.
Hotelnan ta sperando riba instalacion di un barera fiho, den un proyecto financia estilo PPP, pues di Gobierno y sector priva. Esaki a bin di un deal cu Ministerio di Turismo, cu a crea un fondo di 11,8 miyon Dollar pa mitiga y maneha Sargassum den siguiente 5 añanan.
E placa aki lo wordo usa exclusivamente pa pago di servicio di instalacion di 31.524 meter di barera of solucion similar den beachnan di e zonanan di Punta Cana, Bávaro, Cabezá de Toro, Arena Blanca, y Uvero Alto. Esakinan ta principal destino turistico na Republica Dominicana.
