ORANJESTAD (AAN): Recientemente, e Presidente di AVB, señor Lacle, a wordo suspendi pa e directiva di AVB.
Motibo principal pa esaki ta un debe di belasting cu tabata habri, pesey cu FIFA supuestamente a yega di manda e fondo pa salda e deuda ey.
Ta conoci cu AVB mes no tin fondo propio y ta depende totalmente riba e apoyo financiero di FIFA pa sostene futbol na Aruba. Tur luna, tanto e directiva, empleado, como e presidente mes, ta wordo paga via FIFA.
Apenas cu FIFA a haya noticia di loke a sosode na Aruba, e organizacion internacional a insisti riba un reunion urgente cu e Presidente y e directiva. E reunion aki a tuma lugar diamars durante dia, bou di direccion di un representantenan di FIFA.
Durante es reunion ey, a keda cla cu e decision di suspende e presidente no ta legal, y cu e schorsing mester wordo revoca sin perde tempo. FIFA a bisa claramente cu e temanan di belasting ya ta na altura y cu AVB ta ocupando pa paga esnan.
Ademas, FIFA a insisti cu awe diahuebs mester tuma lugar un reunion cu tur club di Aruba, pa aproba un Statuut nobo. Si esaki no tuma lugar, lo tin consecuencia serio pa futbol local.
Segun diferente fuente cu ta circula den comunidad di futbol, si e schorsing no ta revoca y si e Statuut no ta pasa rapido, e deporte ta enfrenta un peliger grandi. E situacion financiero por colapsa, futbol por wordo tranca, y salario di tur empleado na AVB por wordo para. Algo semejante a ya pasa na Corsou cu FFK aña pasa, ora FIFA mester a interveni duramente pa pone ordo bek.
Un otro informe ta indica cu e directiva no kier saca un comunica oficial pa prensa of pa e teamnan, pesey cu segun fuente nan, ya a wordo acorda cu FIFA. Esaki ta crea e sospecha cu e directiva ta ‘hungando cu candela’ y poniendo futbol na Aruba den un situacion peligroso.
Hopi hende ta expresa cu no tin base legal pa e suspension di señor Lacle, y cu posiblemente e ta un move strategico pa stroba e aprobacion di e statuut nobo y e eleccion cu ta spera den 45 dia.
