ORANJESTAD (AAN): Automobilistanan cu pa un of otro motibo, den e ultimo cuartal aki lo no bay haci uso di nan vehiculo (sea ta haci viahe largo, of debi na malesa, of pa otro motibo cu e auto ta daña), por haya dispensacion y no mester paga Impuesto pa Vehiculo di Motor.
Pero pa esaki, tin di tene cuenta cu tin un deadline ta acercando. Meverly Romano di Departamento di Impuesto a splica cu esaki lo ta riba Diabierna 30 di September venidero.
Pues si bo no ta mira cu pronto lo bo usa bo auto mas, ta importante pa bo entrega e plachi di number bek na DIMP. Plachinan cu no wordo entrega pa 3 October 2022, lo no haya ‘vrijstelling’ di impuesto.
Pa un persona por haya dispensacion di belasting, e plachinan aki mester keda minimo 3 luna den poder di DIMP. Di e forma ey, bo ta spaar di bay paga impuesto di e ultimo cuartal di 2022.
E oferta aki ta un sorto di beneficio cu DIMP ta ofrece pagadornan di belasting pa nan paga menos, si acaso nan tin un auto eynan staciona sin cu e ta coriendo, y cu plachi di number poni riba dje pornada.
Pesey bo tin di entrega e plachinan prome cu e ultimo cuartal cuminza, y esey ta 30 di September 2022.
