Rish Ann Ammerland, Trahado Social:
ORANJESTAD (AAN)-- Señora Rish Ann Ammerland, Trahador Social na Fundacion Contra Violencia Relacional (FCVR), den entrevista cu Matutino DIARIO a elabora riba nan recaudacion di fondonan cu ta tumando lugar den comunidad, pa yuda e fundacion.
Señora Ammerland a bisa cu nan ta haci colect dos biaha pa aña, pasobra nan fondo ta wordo cubri parcialmente, pa gobierno y esaki ta haci cu e fundacion ta keda cu falta di fondo pa drecha nan servicio, nan shelter, y pa bin cu proyectonan nobo pa mehora nan servicio pa clientenan.
“Mi tin di bisa cu e ultimo añanan e acogida di comunidad pa e colect tabata bon, pero manera añanan ta bay, e ta baha y mi ta kere cu esey ta pasobra hopi hende no ta cana cu cash awendia, y esey ta haci un tiki dificil pa hende aporta. Pero nos tin un bon acogida di e comunidad di Aruba, y e aña aki nos ta hacie un biaha mas cu e meta di recauda 35 mil florin, esey ta e minimo cu nos kier logra, pero logicamente si ta mas ta miho ”, señora Ammerland a señala. Esaki ta e prome colect pa e aña aki.
“Nos kier a invita comunidad di Aruba pa yuda nos cu e colect aki, nos mester di alomenos cinco pa ocho boluntario pa cada post, pa cada horario. E fechanan ta riba Diasabranan: 27 di Juni, 4 di Juli y 11 di Juli; e horario ta entre 9’or di mainta pa 12’or di merdia y 3’or pa 6’or di atardi. Nos ta para na e diferente rotondenan di Aruba.Contact pa inscribi como boluntario por manda un whatsapp na 593-2767. Yuda nos pa asina nos por sigui brinda nos clientenan nos servicio”, señora Rish Ann Ammerland, Trahado Social di FCVR a duna di conoce.
