E Fundacion por conta cu nan sosten:
ORANJESTAD (AAN) – Minister Rocco Tjon, titular di Husticia y Asunto Social, y Minister di Enseñanza Endy Croes, a hiba palabra durante e lanzamento di e website y Billboard nobo di Fundacion Centro Famia Piedra Plat (FCFPP), diabierna ultimo.
Minister Tjon ta kere cu esaki ta un di e programanan cu ta haci diferencia den nos comunidad. “Mi ta kere cu boso por ta hopi orguyoso, vooral den e parti cu boso ta brinda oportunidad na muchanan di menos recurso”, e dignatario a expresa.
Minister Tjon a bisa cu el a traha hopi aña den e parti di Husticia, y hopi bez pa e tipo di programanan aki, nos hobennan ta bay den caminda robes.
“Mi ta hopi orguyoso cu boso ta haciendo e trabaonan aki, y esey ta e motibo di con Gabinete ta traha hunto cu CEDE tambe, na un forma structural y hopi fondo di nos ta wordo poni disponible tambe pa, entre otro, e tipo di programanan aki tambe por ta un realidad” e dignatario a señala.
El a expresa tambe cu e organizacion aki por ta un ehemplo pa otro fundacionnan y cu ora un fundacion ta bon organiza por logra cu cosnan bira realidad.
Atravez di e programa aki por mira tambe e importancia di tin boluntarionan, cu ta dedica y dispuesto na haci e diferencia.
E mandatario a indica cu e hunto cu su colega Endy Croes ta trahando riba un proyecto yama “Barionan sigur”, cual meta tambe ta pa crea responsabilidad institucional, inverti den e parti fisico y di mantenimento, pa tur cos mustra nechi.
Y finalmente, el a dirigi e siguiente palabranan na Fundacion Centro Famia Piedra Plat:
“Mi ta hopi, hopi satisfecho cu mi a wak esaki cu mi propio wowonan, pasobra e ta hopi importante pa Pais Aruba, y un bez mas hopi pabien!”
Di su parti, Minister Endy Croes a tuma e palabra y a felicita su colega Rocco Tjon, e Fundacion y tur e boluntarionan cu ta duna nan aporte, pa e bunita proyecto aki. El a bisa cu el a mira e proyectonan di FCFPP cu ta Oansa, Cas di Musica, Educacion Creativo, y e parti despues di scol florece, y enberdad, manera señor Berg a comenta, e propiedad aki tin balor sentimental pa minister Croes, ya cu e ta encera un historia familiar. El a acentua cu nan por conta den futuro cu nan sosten y el a felicita e Fundacion, CEDE Aruba y e boluntarionan pa locual tur ta duna di nan parti, pasobra un sociedad no ta gobierno so, ni minister so, of parlamentario so. “Un sociedad ta nos tur, y na final di dia Aruba ta di nos tur y hunto nos tin cu percura pa brinda oportunidad na e chikitonan aki tambe, pa un miho mañan” Minister Croes a conclui.
