Director di CEDE Aruba Daniel Tecklenborg:
ORANJESTAD (AAN) – Fundacion Centro Famia Piedra Plat (FCFPP), ta un proyecto cu for di su inicio CEDE Aruba conoce, y cu a cuminza cu actividadnan los, y poco a poco a bira un organizacion structural. Asina Daniel Tecklenborg, director di CEDE Aruba a indica, en ocasion di e lanzamento di e website y Billboard nobo di FCFPP.
Tecklenborg a subraya cu FCFPP ta un fundacion cu ta depende hopi di boluntarismo, y cu berdad, den un bario, tur actividad ta bin hunto: tanto pa mucha hoben y 60 plussers, como educativo.
El a subraya cu enberdad e comunidad por carga hopi responsabilidad, pero mester duna nan e hermentnan pa nan por hacie, y e ta un organizacion di cual hopi otro por siña for di dje.
Tecklenborg a menciona cu den e periodo di 2011 te awe, CEDE Aruba a inverti 800 mil florin hunto den e organizacion aki cu a haci milagro cu e placa aki, cu aworaki tin un asina bon resultado.
CEDE Aruba ta keda sostene e organizacion aki, segun su director Daniel Tecklenborg, ken ta pidi e ministernan tambe pa apoya organizacionnan asina, y duna nan e tools pa asina den varios bario lo por mira proyectonan asina aki, florece. El a felicita e Fundacion, a bisa nan pa sigui asina y nunca perde animo.
