Pastoor Jairo Maduro disgusta cu hende ta bira lomba p’e
ORANJESTAD (AAN): Siman a habri cu e mensahe cla y raspa cu Pastoor Jairo Maduro a trece dilanti di loke e ta mirando ta socede hopi biaha ultimo tempo durante entiero na Aruba.
Pastoor Maduro ta corda tur hende cu e situacion ta special ora di entiero, ora cu tin di haci respons. Pasobra net ora Pastoor ta predica, bo ta haya hende ta drenta bin dilanti, pa bin condoleer, siendo cu e caha a wordo cera caba, y famia ta sintando ta scucha pastoor.
Segun Pastoor, e dianan aki pa colmo bo no por yega cu T-Shirt di Politiek bisti, cu carson cortico, anto asina bay duna condoleer mientras Pastoor ta dunando palabra di fortaleza na famia. Abo ta stroba famia cu ta scuchando e palabranan di Pastoor! Pues bo ta stroba famia djis pa condoleer nan, y stroba nan di tende e palabranan di forza cu Pastoor ta dunando.
Pesey tin e parti di servicio religioso ora di entiero, y cu tin di respeta ora cu Pastoor ta dirigi su mes na famia. No por ta asina cu hende ta yega laat sea na Misa of na Funeraria, e ora nan kier duna condolencia cueste loke cueste sin sikiera warda par di minuut pa respons finalisa.
Anto hende drenta cu flanel di partido, cu lomba pa cara di Pastoor. Pues hendenan canando dilanti pa condoleer famia, cu lomba pa Pastoor ta wordo considera un ‘falta di respet’.
Mester duna nos mes mas respetuoso ora di despedida. Ta un falta di respet profundo na momento cu e servicio religioso ta andando, y ora di predicashi hende ta kita atencion di famia pa asina “mustra cu mi a bin entiero”. Y despues e hendenan cu a yega laat, ta ni keda 2 minuut sinta eyden pa sostene famia, y ta djis sali bek.
Pastoor a mira cu esaki a bin ta pasando ultimo temponan, y pesey e ta subraya y pidi respet pa ora di despedida cu ya ta momento dificil pa famia. Y ta stroba e predicashi di Pastoor, como cu e tin responsabilidad grandi pa cu e famia, treciendo palabra di fe. Tin di crea ambiente di fe, mientras situacion ta dificil. Anto hende ta cana drenta, y ta bay dilanti na e Caha di Morto ya caba cera, y pasa papia na famia.
Conseho: Pues bo a drenta misa of funeraria, y bo ripara cu Pastoor ta predicando? Mihor keda warda of sinta patras, spera te ora cu e respons finalisa pa bay duna condoleer. Of yega mas trempan pa duna condolencia normal manera tur otro hende.
Ta di spera cu mas hende tende cuenta cu ora bo yega Funeraria of den Misa y ya caba e respons ta andando, mihor bo keda sinta patras y warda te ora cu Pastoor keda cla prome cu bo bay condoleer famia.
