E dia a yega...
ORANJESTAD (AAN): Manera DIARIO a trece dilanti caba, hues a dicidi cu Paul Croes mester bay sinta su castigo den KIA den loke ta e asina famoso caso IBIS.
A pasa algun dia y no a tende nada mas riba con e proceso aki ta bay pa asina Croes, ex minister durante e gobernacion di e Gabinete Mike Eman, drenta den e instituto coreccional y sinta su castigo relaciona cu locual el a wordo acusa di a comete.
Den e caso aki, ta asina cu Corte Supremo na Hulanda a dicta sentencia den e apelacion di Paul Croes contra e sentencia di Corte Superior. Corte Supremo a rechaza e motibonan di apelacion di Paul Croes y a dicidi cu ta mantene e sentencia di Corte Superior.
Por corda cu e tres Huesnan (Hof) di Corte Superior ta haya ex minister Paul Croes culpabel cu entre e periodo di October 2013 y Maart 2017 a haci corupcion door di laga su mes wordo cumpra pa facilita permiso di traha. Hof ta mustra cu e cumpramento tabata sosode via di e fundacion “Stichting Leadership and Excellence”.
Hof a condena Paul Croes na 3 aña di prison, kitando e tempo cu e tabata sera den KIA. Tambe cu Paul Croes ta wordo kita como empleado di Gobierno y cu pa un periodo di 8 aña e no por postula pa eleccion.
Paul Croes a apela e sentencia aki y Corte Supremo (6 Hues) a evalua e kehonan di parti di e abogado di Paul Croes contra e sentencia di Corte Superior. E Abogado General den Corte Supremo a rechaza e kehonan y a pidi Corte Supremo pa mantene e sentencia di Corte Superior.
Diamars 7 di februari, Corte Supremo di Hulanda a duna di conoce su decision. Corte Supremo a rechaza e apelacion di Paul Croes y ta mantene e sentencia. Esey ta nifica cu Paul Croes ta keda condena na 3 aña di prison, kitando e tempo cu e tabata sera den KIA. E ta wordo kita como empleado di Gobierno y pa un periodo di 8 aña, e no por postula pa eleccion.
E decision di Corte Supremo ta nifica cu Paul Croes mester bay sera den KIA. Ministerio Publico a pone pa e presenta KIA dia 21 di Februari. E dia a yega y diamars ultimo, dos siman despues di su sentencia, Croes a ingresa KIA pa sinta su castigo, descontando e tempo cu el a pasa caba den limitacion.
Paul Croes su declaracion na prensa diamars mainta dilanti di KIA tabata cu e lo carga su responsabilidad cu un mente y un curason trankil.
A bisa cu e tempo aki e lo enfoca riba cosnan positivo, ademas di yuda esnan cu ta cay cera y yuda den duna les na esnan cu ta desea.
