Yvonne Geerman-Bermudez di Departamento di Asunto Social
ORANJESTAD (AAN): Den un entrevista cu DIARIO, Orthopedagoog di Departamento di Asunto Social, señora Yvonne Geerman-Bermudez, a indica cu dia 9 di januari nan a lansa e campaña 'Un Carnaval Safe pa tur Mucha y Hoben'.
E aña aki nan a scoge pa amplia e grupo di enfoke, mirando cu den pasado nan a enfoca riba mayornan cu muchanan chikito, y e aña aki a dicidi di enfoca riba 14 punto pa mayornan, tanto e muchanan como tambe di hobennan.
E meta di e campaña ta pa concientisa mayornan durante temporada di Carnaval. Por ehempel, si un mayor tin un yiu di cinco aña, nan conseho ta pa preferibel laga e mucha na cas, sea cu un di e mayornan mes ta keda cas cu e mucha, pero si esaki no ta posibel, laga un persona di confiansa cuida e mucha.
Nan tambe ta recomenda si e mayor ta scoge pa busca un lugar pa e mucha keda, nan por check e Facebook di Fundacion pa Nos Muchanan, cu a publica diferente opvang cu nan ta recomenda. Tuma contacto cu e opvang y bay check loke nan tin di ofrece y si e lugar ta safe. Ta sumamente importante pa un mucha bao di 5 aña, keda na un lugar safe. A pesar cu nan ta recomenda e opvang, semper ta bon pa mayornan mes bay check e lugar y si nan ta haya cu esaki ta un lugar safe pa nan yiu.
Yvonne Geerman-Bermudez a bisa cu ta mas recomendabel pa e mayornan mes cuida nan yiu, y asina asegura cu bo yiunan ta safe durante temporada di Carnaval.
