Acuerdo di Dubai ta confirma decision crucial pa futuro di Aruba
- Prioridad mundial nobo ta sobrevivencia di planeta tera y hende
- Proyecto Acciona na Aruba ta bira modelo pa maneho responsabel
ORANJESTAD (AAN)- Dia 29 di Augustus 2023, un decision di Gobierno di Aruba a bira noticia internacional di importancia.
Riba plataforma mundial a bira conoci cu Acciona Energia a yega na un acuerdo cu compania di estado di Aruba riba tereno di energia, pa desaroya e proyecto pa un planta di hidrogeno na e pais.
Cu Aruba lo a bira centro pa energia alternativa un dia, no ta algo cu a nace di su mes pero ta resultado di un decision gubernamental historico pa Aruba, den cual e curashi politico di Prome Ministro Evelyn Wever-Croes lo tabata e factor principal.
Final di 2023 ta confirma cu Prome Ministro Evelyn Wever-Croes a marca historia na momento cu el a pone un banda su popularidad politico y a dicidi na fabor di loke ta bon pa Aruba, cu mester pone un fin na e careda pa introduci un refineria na Aruba como opcion mas importante di economia.
Pa comprende e decisionnan di Prome Ministro Evelyn Wever-Croes, cu a marca su maneho economico na Aruba, mester mira e lucha cu a wordo hiba mundialmente na Dubai durante ultimo dianan, pa anuncia cu e Era di Petroleo lo yega na su fin y cu hende mester defende e interes di clima, e interes central di planeta tera, cu ta na peliger.
Awe tempo ta aplaudi e maneho economico di Evelyn Wever-Croes, cu a hereda gobernacion di Aruba, na momento cu e proyecto di refineria Citgo, tabata amenasa di ciega e votadornan na Aruba, cu a conoce su desaroyo economico pa medio di petroleo, manera a pasa cu tanto lugar na mundo.
Citgo tabata representa pa e Pueblo di Aruba, e forma cu Gobierno Mike Eman lo a produci un super economia pa e pais, cu a wordo pone den man di Nicolas Maduro na momento cu henter mundo tabata cera porta pa negoshi cu Nicolas Maduro.
Na 2017, despues cu Pueblo di Aruba a dicidi cu Evelyn Wever-Croes mester a dirigi Aruba pa un futuro nobo, e accion mas importante di Wever-Croes tabata pa rebiba economia di Aruba na un forma real.
Den esaki a kita e yabi di e restonan mortal di e refineria na Aruba, for di Venezuela y a cuminsa cu exploracion di posibilidadnan nobo pa refineria na Aruba.
E consorcio mundial di refineria, Quanten, a demostra interes pa habri un refineria cu un base moderno pa Aruba. Un proyecto cu a haya sosten di Gobierno Wever-Croes, cu sinembargo na cierto momento a notifica Aruba, cu mester mira futuro den cual no tabata tin lugar mas pa petroleo.
E determinacion di Prome Ministro Wever-Croes pa declara buskeda di un compania petrolero como pasado y pa diversifica economia y atrae loke ta cuadra cu e futuro mundial responsabel, awe ta haci cu Aruba tin un proyecto pa yega na un planta di hidrogeno.
Na caminda pa 2024, lidernan mundial porfin a topa otro, den proclamacion di e fin di Era di Petroleo, cu a bira e punto clave den e Acuerdo nobo pa clima cu tur pais mester respeta.
Pa DIARIO e decision cu a wordo tuma finalmente na Dubai, ta uno di mayor importancia pa Aruba, cu na 2023 a firma acuerdo pa yega na e proyecto di hidrogeno prome cu mundo a uni pa habri porta pa un futuro sin petroleo y un cambio di clima na fabor di hende.
Aruba por proclama su mes ehempel di bon gobernacion, den cual central tabata e decision di Prome Ministro Wever-Croes pa no pone beneficio politico su dilanti y no busca popularidad y voto, pero pa dicidi pa un Aruba cu ta modelo pa mundo di responsabilidad pa clima, pa bienestar di hende!
