Minister Endy Croes:
ORANJESTAD (AAN): Siman pasa, durante Conferencia di Prensa di Gobierno di Aruba, Minister di Enseñansa y Deporte Endy Croes a informa cu a extende e estudio na Scol Practico pa Ofishi (SPO) te cu aña 5.
Minister Endy Croes a indica cu e alumnonan di SPO tabata termina nan estudio mucho hoben y no por a drenta mercado laboral di biaha. Pa e motibo aki, a traha duro durante 1 aña pa e aña escolar aki extende e estudio y asina crea oportunidad pa e alumnonan di SPO prepara nan mes mas miho pa mercado laboral.
Durante e conferencia di prensa, e mandatario di Enseñansa y Deporte a indica cu e aña aki tur alumno di SPO cu a termina aña 3, a inscribi pa continua nan estudio den aña 4.
Minister Croes a indica cu dia 3 di september proximo, e klasnan lo habri y ta hopi contento cu por a crea mas oportunidad den enseñansa pa nos hobennan.
Finalmente, e mandatario ta gradici Ministerio di Deporte y e comision cu a traha duro pa introduci aña 4 y 5 pa nos hobennan di SPO.
