Mester studia varios aspecto di maternidad y adapta base legal --- *Un mama no por depone mucha riba caya y yiu por bandona mama --- * Mester studia e papel di personanan cu ta reemplasa mama berdadero
ORANJESTAD(AAN)- Varios factor a contribui na cambio den e realidad di mama y tur loke ta relaciona cu maternidad.
Pa cuminsa mester splica cu ora ta papia di maternidad, ta papia di e hecho cu un hende ta mama, a trece un yiu na mundo.
Mas “inteligente” ciencia a haci hende, mas dificil relacionnan humano a bira y awe comunidad conoce varios desaroyo cu resultadonan directo pa comunidad.
Mas y mas, ora papia di un hende muhe, kier mira den direccion di un profesional riba un tereno financiero, ecomico y social mas eleva.
Hende muhe, ta clasificacion di e ser humano cu a nace cu e curpa cu por atribui na Eva y ora papia di homber ta pensa riba Adam.
E homber ta nace cu e capacidad pa bira tata y e muher cu e capacidad pa bira mama. Si nan kier haci uzo di e capacidad aki, ta keda na nan a base di nan libertad como hende.
Un mama a nace cu e potencial pa trece un yiu na mundo.. Sigur den pasado, tabata tin casonan di persona di sexo femenino, cu a bira victima di nan situacion social of forsa fisico y a bira mama.
Ora esaki no ta e caso, e mama ta opta pa bira mama y ta asumi un responsabilidad cu si leynan funciona manera mester ta, e tata biologico tambe mester carga.
Ta costumber na varios pais y na Aruba tambe, cu familiares ta yuda si e mama mes no por carga su responsabilidad.
Personanan cu merece un estatua como conmemoracion a asumi papel di mama, sin cu nan ta mama, pa entrega muchanan cu no por a conta cu nan mama, un porvenir.
Familiares sigur a duna aporte tremendo den e tarea di educacion di muchanan sea pa mama por a bay traha.
E gran mayoria di mama, cu a nace capaz pa por atende cu maternidad, a cumpli cu nan tarea y a crea e comunidad moderno di Aruba cu hopi dificultad.
Ley ta vigila maternidad y autoridad por actua den casonan cu un mama bira un problema, crea un problema of un situacion, pa bienestar di e muchanan.
Un mama mester percura pa su yiu y si e pone e yiu riba caya, abusa di e mucha of permiti hende abusa di e mucha, e ta den problema.
Hopi mama ta keda sin come pa nan yiu come.
Awor kico ta pasa cu e mama? Kico a pasa cu tanto dama, cu a base di gran sacrificio, a habri caminda pa nan yiunan?
Nos ta biba den un comunidad cu un grupo creciente di hende di edad. Ciencia a haci cu bida a bira mas largo y e cantidad di grandinan a aumenta.
E hecho cu hende por biba pa mas tempo, a bira un liberacion pa yiunan cu por exigi pa gobierno produci mas cas di anciano, mas personal pa evita cu yiunan tin dolor di cabez cu nan mayornan?
Mester di provision pa hende grandi. Pero no por ta cu Padushi y Madushi ta haya un espacio cu no ta cualifica pa aloha un ser humano, mientras nan placa di pensioen di behez ta paga pa yiunan bay trip.
No por ta, cu un yiu ta depone su mama na un centro di cuido, ta exigi pa personal di e centro sunchi y brasa e mama, mientras yiu ta comporta su mes como huerfano pa e no tin dolor di cabez.
Den nos tempo moderno, hopi mama ta biba cu lagrima den nan wowo pa abandono di nan yiunan, te na momento di entiero cu mester publica nomber di cuarenta miembro di famia.
Dia 7 di Mei ta dia di mama. Dia di e hende, cu a trece un ser na mundo y pa ley mester cuida yiunan cu tin un deber sagrado cu nan mama cu hunto cu nan tata, ta nan origen.
E lucha pa hende muher mester atende cu e dignidad di mamanan bandona, lubida, humilia.
E lucha pa hende muher no ta completo, si muhenan cu ta yama nan mes emancipa, no por mira e dolor di un mama y hasta hende cu a fungi como mama, cu ta wordo maltrata verbalmente, fisicamente of emocionalmente dor di hende cu ta yama nan mes “yiu”.
