Thomas Ruiz kende ta secretario di Asociacion VRA
ORANJESTAD (AAN) – Señor Thomas Ruiz, Secretario di Vereniging Rijscholen Aruba (VRA) a informa, den entrevista cu DIARIO, cu den e proceso di reorganizacion di e Bureau Rijbewijzen Aruba (BER), un dienst nobo ta bin pa Examen Rijbewijs.
Ruiz a duna di conoce cu nan por a compronde di señor Joel Rietmond y di Minister di Husticia, cu dentro di tres of cuater luna, lo tin un departamento nobo unda nan a haya e aprobacion di Conseho di Minister, pa cuminza cune, locual ta un bon noticia, y por fin lo haya locual VRA ta desea.
Tambe, VRA a reuni cu meneer Rietmond representante y alavez miembro di e Vereningin Rijscholen y instructornan na Hulanda, y el a bisa nan cu e ta contento cu nan ta tumando iniciativa di tuma contacto cu Vereningingnan di Reino, pa nan por traha hunto y ta riba mesun linea.
Asina tambe nan por ataca problema cu antes no tabata wordo discuti riba nivel di Reino. Ruiz a expresa cu union ta haci forza y nan ta sostene otro y siña di otro, loke tambe ta un parti positivo.
El a agrega cu e reunion a bay hopi bon y Rietmond tambe a haya oportunidad di pasa na un Rijschool, cu ta Drive School na Cumana, y eynan a papia cu na expertonan tambe, y e combersacion a bay hopi bon. Nan a compronde cu Rietmond tambe ta un ex-agente policial, mescos cu mayoria di e miembronan di VRA. Rietmond a aclarea tambe cu door di e falta di comunicacion tin hopi speculacion, y a wordo aclarea cu e no a bin Aruba pa tuma over, sino pa duna sosten y cu ta esnan di e Vereniging y nan expertonan lo ta un di e stakeholders mas importante, y cu e lo guia e proceso ora tin examen rijbewijs cune, pero tambe nan por intercambia idea cu lo por uza desde Hulanda.
