Dr. Maritza Ordoñez, Consehero Medico DVG:
ORANJESTAD (AAN) – Expresando cu “esaki tabata un momento historico pa Pais Aruba”, en ocasion di e otorgamento di 18 certificado di reconocimento AruBIG, cu a tuma lugar den e Instituto di Calidad na DVG, doctor Maritza Ordoñez a dedica palabranan di gratitud y satisfaccion pa e hecho aki, den nomber di su coleganan.
Na prome lugar, el a yama danki na Minister di Salud Publico señor Dangui Oduber, Drs. Jayburtt Dijkhoff, Aixa Ponson, Veronica Wester di Instituto di Calidad, entre otro, y a subraya cu sin nan nada di esaki lo tabata posible.
“Esaki ta un momento historico pa Pais Aruba y pa nos tambe. Awe ta un realidad cu un grupo di coleganan ta haya e certificado di AruBig, cu ta un medio di registracion pa tur e profesionalnan cu ta brinda e servicio di salud na Comunidad di Aruba. Y pesey, mayoria di nos a cumpli cu e rekisitonan y alavez, esaki ta duna e posibilidad cu nos diploma ta wordo legalmente reconoci y hasta proteha pa e Leynan di Aruba”, dr. Maritza Ordoñez a expresa y reitera su gratitud na Departamento di Salud Publico, y tur su coleganan.
