Directora Gomes-Pieters tocante pago di impuesto di vehiculo:
- Pa 31 di januari e prome mita di impuesto di vehiculo di motor pa 2026 mester ta paga
ORANJESTAD (AAN): Director di Departamento di Impuesto Aruba (DIMP), Drs. Luenne Gomes-Pieters, a remarca cu paga impuesto di vehiculo di motor no ta un impuesto cu a bin manera ladron di anochi. E ta un impuesto cu ta existi pa hopi aña caba. Den un entrevista recien cu DIARIO, señora Gomes-Pieters a duna di conoce cu DIMP ya pa algun aña a habri e posibilidad pa haci pago parcial pa asina duna e contribuyentenan un tiki mas espacio financiero pa haci e pago den diferente pago na unda cu desde September por a cuminsa paga y cumpli cu e deber aki.
Señora Gomes-Pieters a indica cu pa e impuesto di vehiculo di motor pa 2026, tin un total di 2440 contribuyente cu ya a paga ful aña y 1133 contribuyente cu a paga mita aña.
Segun señora Gomes-Pieters, e pensionadonan ta e promenan cu ta cancela nan debe di impuesto pa no bolter e aña cu e debe aki. “Nos ta aprecia e comportacion aki y ta stimula e comportacion di pago aki pa tur ciudadano”, señora Gomes-Pieters a expresa.
E directora di DIMP a remarca cu hopi biaha ciudadanonan ta pensa cu DIMP ta haci fastioso y ta pidi pa duna chens pa paga teniendo cuenta cu eventonan di fin di aña, entre otro Sinterklaas, Pasco, Thanksgiving, Carnaval y fiestanan durante e temporada. “Tur aña ora cu aña bolter, nos ta haya zundra como sifuera esaki ta un impuesto cu a bin manera un ladron di anochi”, Gomes-Pieters a duna di conoce.
Señora Gomes-Pieters a enfatisa cu esaki ta un impuesto cu ta existi pa hopi aña caba y cada ciudadano sa kico mester haci. Gomes-Pieters ta conseha pa traha un presupuesto pa cumpli cu esaki na tempo pagando den diferente pago.
Pa 31 di januari, e prome mita di impuesto di vehiculo di motor pa 2026 mester ta paga. Si esaki no ta e caso, DIMP ta saca un cobransa adicional cu un boet.
“Ban pone enfoke riba nos responsabilidadnan pa pasa un dushi temporada di fin di aña pero tambe cumpliendo cu nos debernan cu nos pais. Cumpli cu impuesto ta cumpli cu pais pasobra entradanan di impuesto ta pone cu gobernantenan por inverti bek den infrastructura, educacion, deporte, siguridad public, den seguro general medico entre otro, cu ta inversionnan cu nos como ciudadano por probecha y goza di nan”, señora Gomes-Pieters a enfatisa.
