ORANJESTAD (AAN): Manera DIARIO a indica caba, entrante awe Diamars 1 Juni 2021, pasaheronan cu ta residente di Aruba lo worde exonera di haci un PCR test pa drenta Aruba ora di bolbe for di exterior.
Importante pa señala ta cu; e ta conta solamente pa pasaheronan cu ta cumpli cu e siguiente tres rekisitonan: (*) Ta residente di Aruba. (*) Ta registra na AZV. (*) A ser vacuna na Aruba y a ricibi su certificado di vacunacion mas cu 14 dia prome cu e viahe back pa Aruba.
Pasaheronan cu ta desea di haci uso di e posibilidad aki tin cu indica esaki nan momento di registra via e online ED card system www.edcardaruba.aw y e online ED card system tin cu worde yena dentro di 72 ora prome cu e viahe di regreso pa Aruba.
Ta recorda e pasaheronan aki pa durante nan yegada na Aruba, tin nan certificado di vacunacion digitalmente disponibel riba e Aruba Health App y tambe un hardcopy como backup.
