ORANJESTAD (AAN): Informacion di Den Haag ta indica cu Embahadora di Panama pa Reino Hulandes Sally Loo Hui a haci un bishita di cortesia na Minister Plenipotenciario demisionario mr. Ady Thijsen.
Durante e bishita a papia riba e relacion entre Panama y Aruba y pa mira unda por expande aun mas e terenonan di cooperacion entre ambos pais, por ehempel riba e tereno logistico. Tambe embahadora Loo Hui a bisa cu Panama por siña di Aruba pa engrandese e sector di turismo, mirando cu Aruba ta exitoso den esaki y tin hopi experticio riba e tereno aki.
Embahadora Sally Loo Hui ta bin for di e mundo financiero, unda el a traha pa diferente banco. Prome cu su nombracion como embahadora di Panama, Loo Hui tabata Chief Operations Officer pa Trusted Advisors Inc.
Embahadora Loo Hui tin un Master degree den Business Administration y Marketing di Latin University of Sciencve and Technology (ULACIT). E potret ta cortesia di Arubahuis.
