Dos Sindicato ta boga pa investigacion
- Gobierno mes a manda pidi investigacion forensico
- Sindicato ALVAST hasta ta boga pa retiro di director
ORANJESTAD (AAN): Gerencia di NV Elmar a tuma nota di un publicacion yena cu insinuacionnan falso y intencionnan personal di kizas algun persona pa crea discordia den NV Elmar.
Locual ta pasando ta cu den NV Elmar tin varios investigacion andando, esaki ta un proceso necesario pa identifica fayonan, coregi y mehora e calidad di maneho y rendimento den diferente division di e compania. Kisas tin algun persona of personanan cu no ta gusta cu e investigacionnan necesario aki ta tumando lugar y ta opta pa inventa fantasia y lansa insinuacionnan anonimo y sin base.
Esey so caba ta kita tur credibilidad di esnan cu ta trata di purba scapa nan mes sushando otro nan bon nomber. Gerencia actual di NV Elmar tin un responsabilidad y tarea sumamente importante pa coregi loke no a bay bon den pasado pa asina sigura e pueblo di Aruba un maneho integro y operacion di suministro di energia confiabel, stabil pa futuro.
P’esey NV Elmar ta trahando tambe cu partnernan internacional, pa yuda mehora e calidad di e procesonan di maneho. Aruba merece un compania di utilidad caminda no ta proceduranan scondi, intimidacion, insinuacionnan anomimo ta dirigi of purba influencia maneho.
Gerencia actual di NV Elmar ta para pa maneho responsabel, profesional y transparente cual ta garantisa stabilidad y progreso di e compania, p’esey e proceso di investigacion ta bay continua y awor amplia segun ta haya ta necesario. Tur cos ta mustra cu ta un grupito di 10 pa 15 empleado cu a planea pa haci e publicacion negativo y eroneo aki.
Gerencia di NV Elmar ta gradici tur empleado cu a expresa nan confianza den nos maneho y tambe na e sindicatonan cu a distancia nan mes di e publicacion.
Investigacion ta bin: Esaki lo bin for di Gobierno mes, cu a manda un carta pa Utilities Aruba NV pa asina instrui nan pa haci un investigacion forensico den NV Elmar.
Ministro Glenbert Croes mes a informa tanto Sindicato ALVAST y tambe Sindicato STA. Pero hecho ta cu for di algun luna pasa caba, Sindicatonan ta bogando pa haci un investigacion den e compania di electricidad, como cu nan a bin ta notando cierto decisionnan dudoso cu no ta normal eyden.
E sorto di ‘Negoshi den Negoshi’ aki tabata wordo observa door di miembronan di e Sindicato mes, y pesey a bati alarma cerca nan representantenan.
Sindicatonan ta apuntando hopi dede den direccion di e Director, cu varios reclamo di e.o. cu e no tin ‘suficiente tempo’ pa dedica na e compania, como cu e ta haciendo hopi viahe.
Gobierno tambe ta spera cu e investigacion lo por produci un mihor bista di loke ta pasando den e compania cu ultimo lunanan a wordo poni bao di un lupa, debi na diferente caso di blackout.
