Noticia di DIARIO confirma!
- Bon mes cu compania tin ‘back-up’ completo y a restaura tur cos!
ORANJESTAD (AAN): Tabata Diasabra 13 di September cu Matutino DIARIO riba su prome pagina a indica posibel atake cibernetico cu a ataca y benta tur sistema y aplicacion di NV Elmar abao. E atake aki a cuminza desde Diahuebs 11 di September caba den oranan di mainta, y esey ta loke e compania di electricidad awor ta confirmando.
DIARIO a compronde cu e atake cibernetico aki a wordo cometi door di hackernan Ruso, y cu nan lo a laga un mensahe hopi serio atras tambe.
Esaki a socede mesun siman cu avionnan di guera Hulandes bulando riba Polonia, a tira y derumba varios Drones Ruso cu lo a uza e espacio aereo Polaco pa bay comete atakenan na Ucrania. E ta wordo hasta mira como un sorto di venganza riba Hulanda y tambe NATO. E siguiente siman a sigui cu un otro atake, cu a paraliza varios Aeropuerto na Europa.
Atake confirma: Mientras tanto riba Diahuebs 25 di September, exactamente 2 siman despues, gerencia di NV Elmar na Aruba a confirma cu nan a bira victima di un Ransomware Attack. Diripiente tur server di NV Elmar a stagna debi cu tur folder a wordo codifica (encrypted) di tal forma cu nan no por wordo uza mas, excepto si bo haci un pago di miyones di Dollar na bitcoin, pa asina haya e “yabi” pa habri tur folder y files bek.
Elmar ta describi nan como “un grupo di hackers”, y e dolor di cabez a start Diahuebs 11 di September 2025, pa exactamente 7:02 am. Personal di IT na NV Elmar a detecta un problema tecnico cu a causa un interupcion temporario den aplicacionnan y sistemanan. Pa 8:03 am, e compania a emiti su prome comunicado publico ‘generico’ na clientenan, stakeholders y a sigui duna actualisacion continuo.
Loke a salba Elmar: Sin duda alguno, e hecho cu NV Elmar tin un programa robusto di haci “back-up” constante di henter nan red di computer na Aruba, a salba nan! Pasobra loke nan tin di haci ta djis reset tur server, instala e Sistema di Operacion bek, y despues cu tur files di back-up, nan ta uza e funcion di ‘Restore’, y tur cos ta aparece bek. Pero e ta tarda basta pa keda cla.
Elmar a confirma cu Diahuebs ey mes nan a cuminsa restaura e sistema. Personal di IT trahando non-stop, y ya pa e siguiente dia 12 di September, mayoria di e aplicacionnan ya tabata restaura y e servicio na clientenan tabata operacional. Finalmente, pa Diadomingo 14 di September, tur aplicacion tabata completamente operacional atrobe.
E compania NV Elmar a splica cu nan ta trahando hunto cu expertonan internacional den cybersecurity y cu autoridadnan local, pa investiga e incidente y asisti cu e respuesta, den un esfuerso conhunto pa reforza siguridad y vigilancia di e sistemanan. NV Elmar ta admiti cu nan a bira victima di e ‘Ransomware Attack.’
A download lista di cliente: Ademas cu e hackernan a codifica tur files y folder riba e computernan, pero cu ya caba nan tur ta funcionando bek desde 14 di September, toch nan ta admiti cu hackernan a logra di download Elmar su lista di cliente y informacion di ‘Customer Account’ den un forma no-autorisa. DIARIO ta pensa aki cu ta djis nomber, adres, y number di cuenta lo a lek aki. Pasobra ta duda cu Elmar ta warda numbernan di credit card of algo similar cu lo por a lek.
Bon noticia ta cu e grid di coriente, y tur meter di coriente rond Aruba a keda protegi y suministro ta sigui na un forma sigur y sin interupcion.
Director Anthony Irausquin di Elmar a declara encuanto e situacion, bisando “Esaki no ta solamente un atake riba sistema di Elmar, sino tambe riba e confiansa cu nos ta comparti cu nos comunidad. Nos ta tuma e situacion aki sumamente na serio, cu enfoke riba proteha nos clientenan, fortifica nos defensa y mantene nos comunidad totalmente informa.”
E compania a splica cu nan ta inverti continuamente den proteccion di su grid electrico y servicio na cliente. Atakenan cibernetico ta aumentando mundialmente, afectando companianan den diferente sector. Esaki ta motibo pakico e enfasis di Elmar ta pa sigui fortalece y adapta nos sistema di defensa debi cu e atakenan cibernetico ta sigui evoluciona.
Aunke na Aruba no tin un obligacion legal pa divulga incidente manera esaki, compara cu GDPR na Europa, toch gerencia di NV Elmar a scoge pa informa su clientenan y comunidad. Elmar ta lamenta cualkier preocupacion cu e incidente aki por a causa, sinembargo ta garantisa comunidad cu tur esfuerso local y internacional necesario a wordo haci y ta continua pa fortalece defensa di nos sistemanan pa garantisa stabilidad di suministro di electricidad y e miho servicio na comunidad.
E compania di electricidad ta gradici su personal tecnico y partnernan local y internacional cu a responde rapido y efectivo pa limita e impacto di e atake cibernetico. Investigacion ta continuando y segun tin mas informacion, Elmar lo percura pa informa comunidad.
