Ursell Arends ta anuncia transicion di liderazgo
- Reorganizacion pa logra stabilidad y eficiencia a largo plaso
- Ministro no a bisa nada si Frederick Nuboer lo tuma e puesto
ORANJESTAD (AAN): Edwin Mohamed no ta Director mas di Arubus. Despues di algun siman tenso, e confirmacion a drenta oficialmente di Ministerio di Transporte, kendenan a anuncia un transicion importante di liderazgo na Arubus N.V.
Diabierna, den respuesta na e retonan financiero y operacional, Arubus N.V. Aruba ta pasando pa un reorganizacion pa logra stabilidad y eficiencia a largo plaso.
Ministro Ursell Arends asina a indica cu Sr. Edwin Mohamed lo separa su cargo como Director di Arubus N.V.
“Desafortunadamente mester remarca cu ta pa politica Arubus ta para unda cu e ta awe. Un compania cu ta bancarota segun, no solamente Gobierno di Aruba, pero Algemene Rekenkamer, CAft y PriceWaterhouseCooper”.
Pa e motibo aki mester tuma e decision clave na e momento crucial aki di restructura e compania pa asina pon’e ariba caminda di recuperacion real. Raad van commissarissen a ricibi un carta di Gobierno di Aruba pidiendo un reorganizacion completo cu e participacion di e trahadonan.
Ministerio ta extende su mas profundo aprecio na Sr. Edwin Mohamed pa su añanan di servicio y su contribucion na Arubus N.V. Aruba.
E reorganizacion aki ta esencial pa futuro di Arubus N.V. Aruba, y Gobierno di Aruba lo sigui mantene e comunidad informa di cualkier desaroyo adicional.
Ministro no a duna ningun informacion si acaso Frederick Nuboer (riba potret) lo bay ta e candidato nobo pa ocupa e puesto di Director di Arubus.
Ta conoci ademas, cu Arubus ta un compania cu tin e filosofia pa suministra transporte publico pa pueblo di Aruba principalmente, y esaki ta algo cu casi hamas lo bay produci ganashi. Ta di spera cu Gobierno aki ta compronde e esencia fundamental ey claramente.
