Directora di Stichting Reclassering ta splica:
- Sinti nan mes acepta manera nan ta, ta hiba nan drenta den gang of grupo
ORANJESTAD (AAN)- Den entrevista cu DIARIO, e directora di Stichting Reclassering, Seraida Pemberton-Leonard, a menciona cu pa un hoben forma parti di un gang no ta e parti financiero sino mas bien e parti emocional y psicologico; e salud mental di e hoben, ta hib’e na e decision.
“Hobennan ta join e gruponan en general pasobra nan ta sinti cu nan ta parti di algo. Nan ta wordo acepta door di nan peers, door di un grupo cu ta acepta nan manera nan ta. Hopi biaha bo ta haya cu tin hopi problema social na cas, cu e comunicacion entre mayor cu yiu no ta bon, anto nan ta busk’e cerca amigonan unda nan a wordo acepta manera nan ta”, señora Pemberton a acentua. Corda cu tin gruponan positivo y gruponan negativo, el a indica. Anto, e aspecto di pertenece na algo cu ta acepta e hoben con e ta, cu no tin reglanan manera tin den e cas, ta pone cu hopi biaha un hoben ta bay eynan, y tambe pa motibo di e gang of gruponan e hoben riba su mes no ta sinti sigur y ta afilia na un grupo unda e ta sinti su mes proteha.
Dificil pa mayor: Señora Pemberton a sigui splica cu aworaki Reclassering ta dunando e hoben guia individual y guia den grupo. “Por lo general bo ta wak cu e mayornan, den hopi caso, ta indica cu nan no por handle nan yiu. Pues, nan no tin e tools necesario con pa paak aan un teener. Mester tene cuenta cu gran parti di e hobennan cu ta cay cera, ta locual nos ta yama L.V.B (Licht verstandelijke beperkte jongeren). E mayornan hopi biaha no sa con pa handle nan yiunan den nan desaroyo como teener, y tambe cu ta LVB’ers. Anto, e combinacion aki, hopi biaha no tin e conocemento con pa handle e hobennan”, Pemberton- Leonard a subraya.
Un aspecto hopi interesante cu señora Pemberton a trece dilanti, tocante pakico pa diferente mayor ta dificil guia nan yiunan, y esey ta pasobra hopi biaha nan tambe tin problemanan, tin cu a cay cera tambe, y tene cuenta cu awendia e hobennan no ta e hobennan di antes. Mayornan mester di otro tools pa educa nan yiunan.
El a subraya cu aworaki no ta tanto e cantidad di e hobennan cu ta cay cera, cu no ta asina grandi, pero e problema cu nan ta trece cu nan mes ta bira hopi mas complica, y por wak cu e edad ta bahando y tambe cu e calidad di e hobennan aworaki tambe ta otro. Y eynan ta unda mester di mas tools pa desaroya bo mes pa por maneha e criminalidad hubenil. “Aña pasa nos tabata papia di 80 hoben cu a cay cera, aworaki nos ta papia di cien hoben cu ta cay cera”, señora Seraida Pemberton-Leonard, Director di Stichting Reclassering a manifesta.
