Na comienso di añanan 1900 na Aruba no tabata tin coneccion di tubo di awa na cas.
Tur hende tabata bai pos pa busca awa. Esaki ta conta tanto pa den Oranjestad y tambe pa e otro barionan. Aruba su poblacion tabata hopi chikito.
Den e temponan ey no tabata tin mucho pos di awa tampoco. Cornelis Hendrik Eman (1865-1914) a pidi gobierno un tereno pa por coba algun pos di awa dushi den vecindario di Madiki y Rancho. A coba diferente pos pero no a haya mucho awa.
E poco awa cu por a logra saca for di e posnan tabata usa pa bende na e barconan mara den waf di Oranjestad. Tabata pomp e awa pa medio di un mulina di biento for di e pos y esaki ta yega por medio di tubo te na e barconan mara den waf. Esaki tabata genera un tiki di entrada pa e compania.
Pa purba abastece casnan de vecindario cu awa fresco, e compania di Cornelis Hendrik Eman a laga construi un tanki di awa traha di cement den centro di Rancho. A traha e tanki na 1905 den loke antes tabata yama Noordstraat cu awe ta conoci como Avenida Alo Tromp.
For di e tanki di awa aki a conecta e tuberia necesario pa laga awa fresco core pa e casnan. E tempo ey por bisa cu tabata un proyecto masha grandi y e habitantenan tabata contento cu nan coneccion di awa. E casnan tabata haya solamente un cranchi y ta compania ta cobra solamente entre75 cent pa fl 3.00 pa luna pa e cranchi. Tur tabata depende di e grandura di e craanchi. No tabata cobra e uso di awa.
Cu e construccion di e tanki di awa y e coneccion di tuberia por bisa cu Aruba a haya su prome coneccion di awa potable.
E compania a encontra diferente contra tiempo cu e coneccion di awa. No ta tur ora tabata tin suficiente awa den e posnan pa motibo di secura y tabata tin hopi mal uso di awa na e casnan. E hendenan tabata laga e awa core for di e cranchi of nan mes tabata yena nan halifat di awa y pasa bende e awa masha scondi mes den otro barionan y saca bon ganashi.
Cu e fayecimento di Hendrik Cornelis Eman na 1914 e compania ta haya un sla y ta cai den mas problema financiero y ta stop di existi.
Desde tempo ey a stop di haci uso di e tanki di awa den Rancho.
Na 1970 cu a transpasa e tanki di awa pa Gobierno di Aruba. Segun e tempo ta pasa e estado di tanki ta bira mas decai y tabata den peliger di basha den otro. Na 2019 Stichting Monumenten Fonds Aruba a tuma e Tanki di Awa den Rancho y declara esaki como un monumento nacional. Di biaha ta cuminsa cu e limpiesa y mantencion.
E tanki di awa ta unico den su forma y structura y ta pertenece na e historia di produccion di awa na Aruba y tin gran balor pa Aruba su historia economico y cultural.
Foto: Stg Monumentenfonds Aruba
Compila pa Roberto Croes
Nos Historia Nos Herencia
