Tin motibo cu un gran cantante ta inspira publico un bida largo
*E mensahe di Arubianismo entrega na tur generacion y mundo
ORANJESTAD (AAN) — Si Etty Toppenberg asina a desea, e por a bira un artista di fama internacional hopi tempo pasa.
For di momento cu Trio Huasteca a haci su presentacion na e Festival di OTI y “Cuando un Amor se Muere” a resona, e portanan grandi di mundo internacional di farandula a habri pa e trio y sigur pa Etty Toppenberg.
Un talento unico a introduci su mes y te awe ta ocasiona e mes impacto cu cuarenta aña tabata e caso.
Despues di 65 aña, Etty Toppenberg ainda ta uno di e artistanan mas solicita pa Aruba, cu awe ta rindi homenahe na su persona pero tambe mester admiti cu el a laga un tremendo ehempel atras no solamente pa musiconan di Aruba pero pa tur hende na mundo.
Cu Etty Toppenberg tin un voz excepcional, ningun hende por desmenti. Tras di e voz ta sconde un hende cu ta resalta pa mucho mas cu e solo hecho cu e ta artista y cu e tin fama.
Pa ta sincero, ta e hecho cu ora atende cu Etty Toppenberg ta lubida cu ta atende cu un artista, ta haci cu Etty Toppenberg a bira uno di e artistanan mas grandi cu Aruba a yega di produci.
E personalidad di Etty Toppenberg, e forma cu e ta presenta su mes como hende, e respet cu e ta exigi sin bisa su nomber, ta loke a haci Etty grandi.
E mucha di Companashi a keda un Arubiano entre Arubiano pa entrega na generacionnan nobo di awe e mensahe grandi, con ta habri porta pa futuro, alcansa e logronan di mas grandi pero keda hende pa hende.
Pa e por a haci esaki, e mester tabata tin e educacion cu el a ricibi na cas for di prome momento.
E educacion tipico Arubano ta basa riba respet di hende pa hende, di convivencia como parti di un Pueblo uni, di ta parti integral di un Pueblo di cual bo ta por ta orguyoso.
Awe ora mi felicita Etty Toppenberg, mi no ta mira solamente e artista cu a pone cu te awe mi por canta cada palabra di e cancion “Cuando un amor se muere” pero mi ta mira mas leu cu e persona cu a pone henter Antiya Hulandes cu el a representa cu e cancion aki na OTI, grita di alegria pa e logro di Trio Huasteca.
Etty Toppenberg ta presenta e Arubiano na mundo. Musica, alegria, e toke humano cu nunca ta bandona e limitenan hancra den un bon educacion.
Aruba e siman aki a rindi homenahe na un miembro destaca di e mundo di farandula di Aruba cu ta entrega e mensahe, cu porta ta habri pa tur hende cu sa con comporta nan mes.
Hende tin confiansa di canta y gosa hunto cu Etty Toppenberg, cu por drenta tur cas pasobra nunca el a bandona e respet cu e mester duna pa asina automaticamente hende duna su persona e respet cu e merece.
Ora e cuminsa canta, tur hende ta canta. Un ambiente dushi, un ambiente Arubano ta contagia uno y tur.
Esaki pa mi persona sigur ta Etty Toppenberg y gran mayoria di artistanan di Aruba y ta e motibo di logronan grandi di artistanan pero tambe di tur otro talento di Aruba.
Pabien Etty! Bo merece e homenahe como uno di e artistanan mas talentoso cu Aruba a conoce. Bo merece e homenahe tambe pa e ehempel cu bo ta entrega na mundo cu tin tanto necesidad di e talentonan cu bo tin como hende, como Arubiano cu ta sigui demostra mundo pakico Aruba ta grandi!
