Diadomingo 23 a wordo proclama den tur Misa:
ORANJESTAD (AAN) Diadomingo 23 di November aki, Iglesia Catolico a conclui e Aña Liturgico cu e Solemnidad di Cristo Rey di Reynan. Asina a recorda mundo henter cu ni ningun cos, persona, of ley humano, ta ariba Dios. Cristo ta Señor di tempo y historia, manera e ta Señor di tur cos cu a wordo crea.
E Solemnidad di Cristo, Rey di Universo, Rey di Reynan, a wordo institui door di Papa Pius XI na aña 1925, pues cien aña pasa.
Cu be, e Santo Mama Iglesia kier pa nos fiha nos wowonan na nos Señor, Rey bondadoso y senciyo, y laga nos wordo conduci p’E. Hesus Cristo, como e bon Pastor, ta guia e porcion di e Iglesia cu ta peregrina den e tera pa su destino final: E Reino di Dios.
No mester lubida, ademas, cu e posibilidad di alcanza e Reino di Dios, a wordo gana caba door di Cristo mes, y cu esaki ta wordo preserva den e Iglesia y danki na e Iglesia. Kiermen, e Iglesia funda door di Hesus ta e garantia cu e victoria ta semper posibel, y cu e portanan di Cielo ta semper habri. E Spirito Santo ta Esun cu Cristo a encomenda pa concede e santidad y transforma e mundo segun si Santo Boluntad.
Cristo Rey ta convoca awe, un bez mas, na “instaura Su Reino den e tera”, pa mundo cu nos colaboracion, bay wordo transforma segun e plan divino di Amor. E tarea aki ta cuminza lagando Cristo reina den cada Curazon. No ta tata aki di un proclamacion, of declaracion retorico, sino un yamada real y serio na e conversion. Ban acoge nos mes na e Gracia di Dios y ban rechaza e pica. Laga nos no permiti pa e mal avanza! Feliz Solemnidad di Hesus Cristo, Rey di Universo.
