DIARIO ta analisa exigencia di Simar den situacion mundial explosivo --- *Prome Ministro Wever-Croes no por haci promesa den confusion actual --- *Aruba mester prepara su mes pa temponan internacional turbulento
ORANJESTAD (AAN) — Tur politico, tur gobernante sigur lo kier colma nan trahador y henter Pueblo di cu beneficionan cu e caha di Pueblo ta paga.
Uno di e problemanan grandi cu Aruba tin riba tereno financiero ta hustamente, e forma cu wega politico a wordo hunga cu placa di Aruba di 2009 pa 2017, ora Aruba a keda bancarato.
Ta e situacion di bancarota tabata realidad di Aruba ora e mester a confronta Covid-19 pero tambe otro elementonan cu ta aumenta gasto di tur Gobierno na mundo.
Aruba a keda sin economia practicamente, pasobra mester a cera porta di turismo.
Gobierno a subsidia economia pa por a tene trahadornan na trabou, cu comercio no tabata tin mas pa ofrece.
Gobierno, cu tambe tabata sin un parti grandi di su entrada, a scapa companianan local y nan trahadornan, loke na hopi pais na mundo no tabata e caso y situacionnan financiero desastroso ta reina cerca cantidad di hende cu a perde nan trabou.
Aki ta yega na e punto central, cu cantidad di experto cu ta bini cu cantidad di teoria ta lubida.
No ta berdad cu comercio lo a tene tur su trahadornan na trabou, si e no tabata tin entrada mas.
Ley di retiro lo tabata aplicabel pasobra no por tin trahador sin placa pa paga pa trahador.
Den servicio di Gobierno esaki ta diferente pasobra gobierno ta basa riba politica, cu ta basa riba gobernante politico, cu por manda cas aunke tin prueba cu e gobernante mester tuma medida pa e pais no zink.
Aruba sin placa, mester a busca solucion pa e placa cu personal di Gobierno ta costa Pueblo y cu ya (manera sindicatonan di gobierno ta na haltura) tabata mara na gastonan cu Aruba no por carga.
Ningun hende di buena fe ta mishi cu un trahador sin mas. Pero mester mira realidad.
Henter mundo ta den un situacion sumamente serio, den cual diferente crisis ta uni.
E pandemia a presenta na momento cu inversionnan mester a wordo haci pa confronta cambio di clima, cu lo afecta entre otro beachnan di Aruba.
Na mes momento mester atende cu e conflicto den mundo petrolero, cu ta mishi cu tur prijs mientras awor ta sonido di guera por wordo scucha.
Inseguridad y mas inseguridad pa Aruba, cu a wordo financieramente destrui entre 2009 y 2017, manera tur documento ta proba.
Comercio a sigui lora cu yudansa di Gobierno, cu asina a percura pa 90 porciento di Aruba no confronta hamber ora pandemia a bati na porta.
Den comercio por bisa cu mayoria di trahador a entrega parti di nan sueldo pasobra comercio no tin placa.
Prijsnan ta subi rond mundo y si prijs sigui subi benta ta baha y hende mester bay cas.
Gobierno (Pueblo di Aruba) mester sigui funciona cu prijsnan mas halto den gobernacion di e pais, cu mester sigui funciona.
Di unda placa mester bini awor pa gastonan extra di Covid-19 y tur otro gasto cu a aumenta sigur a base di debe cu Aruba tin?
Esaki sigur ta e pregunta si tene na consideracion e resultadonan cu e conflicto mundial lo por tin pa Aruba.
Na e momento aki Aruba mester di e yudansa Hulandes cu por bira mas necesario a base di e situacion mundial sumamente peligroso crea na Ucraina cu tin mundo den estado di guera.
Gobierno mester uza su cabes den cualkier trato preferencial na un grupo di trahador. Ademas Gobierno mester di aprobacion di Hulanda pasobra Gobierno no tin placa den e situacion cu Omicron a hinca mundo pero cu e menasa di guera mundial ta haci mas serio.
Aruba mester realisa cu e desaroyonan serio riba diferente tereno na mundo, ta exigi pa Gobierno ta mas cauteloso cu nunca.
Prome Ministro a mustra cu ainda e no por bisa cu no mester sigui haya ayudo di Hulanda debi na e forma cu Omicron a plama. Awor ta un peliger mas a haci e situacion mundial mas grave y mas insigur.
Na Gobierno Wever-Croes a toca goberna Aruba den e situacion mas dificil cu Aruba a conoce.
Si e no uza su cabez y su concenshi, un caos financiero lo ta resultado pa Aruba.
