Banco Central di Aruba
*Esaki ta indica cu mas entrada for di exterior a drenta Aruba cu a sali
ORANJESTAD (AAN): Banco Central di Aruba (BCA) a publica dialuna nan “Economic Outlook” di mas recien pa e sector externo. E publicacion aki ta contene pronosticonan economico riba termino cortico (2026-2027) y termino mediano (2028-2030).
E prome mita di 2026 a registra un surplus riba e cuenta coriente di Afl. 685,4 miyon. Esaki ta indica cu mas entrada for di exterior a drenta Aruba cu a sali, incluyendo entrada for di comercio, labor, capital, y transferencia. E surplus riba e cuenta coriente tabata eleva, debi na mas entrada for di turismo. Sinembargo, e efecto aki a wordo mitiga door di importacion di mercancia y servicio. E cuenta financiero tambe a registra un entrada netto di Afl. 206,2 miyon durante prome mita di 2026, indicando cu Aruba a ricibi mas financiamento for di exterior cu el a provee.
E surplus riba e cuenta coriente registra den e prome mita di 2026 probablemente lo continua den termino corto y mediano, sosteni pa continuacion di crecemento den entrada di turismo. Sinembargo, BCA ta proyecta cu e cuenta financiero lo registra un salida netto den e añanan binidero. Esaki ta pasobra, entre otro, Gobierno di Aruba probablemente lo paga mas na debe den exterior cu e lo ricibi na fiansa nobo. Ademas, ta spera cu e inversionnan di portfolio, por ehempel ora inversionistanan institucional na Aruba cumpra y bende bono stranhero, lo resulta den un salida netto. No obstante, e surplusnan proyecta riba e cuenta coriente lo ta mas grandi cu e salidanan netto di e cuenta financiero. Consecuentemente, Aruba lo probablemente registra surplusnan consecutivo riba su balansa di pago (BdP).
E surplusnan proyecta riba e BdP ta contribui na un aumento den e reserva di divisa, y ta percura pa e reservanan aki keda adecua segun e diferente normanan cu ta monitoria. Riba termino cortico, ta proyecta cu e reservanan internacional lo cubri entre 8,9 y 9,3 luna di e pagonan riba cuenta coriente, ampliamente riba e minimo recomenda di 3 luna. Ademas, den futuro cercano, e reservanan oficial cu ta pronostica lo keda riba e limite superior di e “Assessing Reserve Adequacy (ARA) metric” di e Fondo Monetario Internacional (IMF).
E reserva di divisa lo keda adecua tambe den un scenario desfaborabel di costo halto di importacion di petroleo, unda e prijs di petroleo ta keda eleva pa un tempo largo. Di otro banda, e duracion y intensidad di e guera entre Merca y Iran por ta diferente di loke ta asumi den e scenario aki. Banda di e riesgo importante aki, e pronostico di referencia ta suheto na varios otro riesgo domestico y internacional, incluyendo un crecemento den turismo mas abou cu loke ta anticipa, e guera comercial andando, otro conflictonan militar, un mercado laboral mas preta, retraso den proyectonan di inversion y cambionan den maneho fiscal.
E publicacion completo ta disponibel riba BCA su website: https://www.cbaruba.org/document/economic-outlook.