Segun expertonan - *Crisis den e cadena di suministro global lo bira peor
ORANJESTAD (AAN): For di aña pasa, ora cu e pandemia a inicia, tambe a inicia un crisis mundial relaciona cu e dificultad pa transporta e productonan for di un continente pa otro. E stagnacion den e sistemanan di transportacion y despues e scarcedad di containernan y como consecuencia e aumento den e prijsnan tin comercio mundial den un situacion alarmante cu e posibilidad cu e lo sigui escala.
E empresanan cu ta abastece di productonan na China tin basta tempo caba luchando cu e congestion den e puertonan, e aumento di e tarifanan di e fletenan y e retrasonan.
E aumento di e prijsnan y e reduccion di e produccion lo por nifica mas problema pa e cadenanan di suministro mundial cu ta den tension extremo.
E pesadiya di e cadena di suministro ta aumentando e prijsnan pa tur e consumidornan y retrasando e recuperacion economico mundial.
Segun Moody's Analytics, e interupcionnan den e cadena di suministro "lo bira peor prome cu mehora".
"Den e medida cu e recuperacion economico mundial ta haya forsa, locual ta cada bes mas evidente ta con e lo wordo obstaculisa pa e interupcionnan di e cadena di suministro cu awor ta apareciendo den cada skina", asina Moody's a indica.
Den un articulo publica pa CNN, a wordo mustra con IMF (Fondo Monetario Internacional) a rebaha su pronostico di crecimento di Merca pa 2021 den un punto porcentual, e maximo pa cualkier economia di e grupo G7.
IMF a referi na e interupcionnan den e cadena di suministro y e debilitamento den e consumo, cu na mesun momento a wordo impulsa den parti pa e 'bottlenecknan' den e cadena di suministro, manera e falta di autonan nobo meymey di e scarcedad di chips di computer.
E informe di Moody's ta sigui indica cu e controlnan na e frontera y e restriccionnan di mobilidad, e falta di disponibilidad di un pass di vacuna global y e demanda reprimi door di ta stanca na cas a wordo combina pa un tormenta perfecto den e produccion mundial cu lo wordo obstaculisa pasobra e entreganan no ta wordo realisa na tempo, e costonan y e prijsnan lo aumenta y e crecimento di e GDP internacionalmente no lo ta asina solido como resultado.
Moody's a bisa cu e "eslabon mas debil" por ta e scarcedad di chauffeurnan di truck, un problema cu a contribui na e congestion den e wafnan y a provoca cu e stacionnan di gasolin na Reino Uni ta keda sin combustibel.
Moody's a adverti cu tin "nubianan scur" pa loke ta e futuro pasobra varios factor ta pone cu e superacion di e limitacionnan di suministro ta hopi desafiante.
E compania a señala e diferencia den e forma cu varios pais ta luchando contra Covid-19, con China ta premira ta tin cero caso mientras cu Merca ta mas dispuesto na biba cu Covid-19 como un malesa endemico.
"Esaki ta presenta un desafio serio pa armonisa e reglanan y regulacionnan pa cual e trahadornan di transporte ta drenta y sali di e puertonan y centronan di mundo henter", e analistanan a remarca.
Na di dos lugar, Moody's a cita e falta di "esfuerzo global pa garantisa e bon funcionamento di e red mundial di logistica y transporte.
Sinembargo, otronan ta mas optimista relaciona cu e perspectivanan riba e cadena di suministro.
E director ehecutivo di JPMorgan, Jamie Dimon, a bisa cu e contratiemponan aki den e cadena di suministro lo disminui rapidamente.
E ta kere cu esaki no lo ta problema na 2022. E sistemanan grandi di mercado lo ahusta manera e empresanan a hacie.
Por menciona cu entre otro, e productonan mas afecta pa e cadena di suministro ta: avionnan, washmashin, kopienan, coy hunga, kerstboom, sapato y paña, celularnan, auto y computernan y filetnan.
Covid-19 a bira un problema grandi den e situacion aki. Nobenta porciento di e productonan na nivel mundial ta move via barco y mayoria di nan ta procedente di China.
E contagionan y e restriccionnan imponi pa e pandemia a afecta e trahadornan den e terminalnan portuario 'kibrando' e cadena di suministro hopi biaha.
Esaki ta pone den evidencia e fragilidad den e cadena di suministro mundial cual ta depende di un marinero como di un chauffeur di truck pa haci e entrega di mercancia.
