Directie Natuur en Mileu:
ORANJESTAD (AAN): Directie Natuur en Milieu a publica otro informacion interesante relaciona cu e fauna di Aruba. E biha aki a elabora riba Dori.
E dori of dori maco (Pleurodema brachyops) conoci na Ingles como e ‘Colombian four-eyed frog, ta midi 3 pa 4 centimeter largo. E dori chikito aki tin un apariencia peculiar cu ta diferencie di otro dorinan.
E tin dos mancha scur, por bisa preto, riba su lomba cu tin un parecido na extra wowonan. E manchanan aki ta pa spanta y confundi su enemigonan y asina e ta defende su mes.
Por reconoce e dori na su pianan parti patras cu tin vleknan color cora y manera blauw scur. E dori macho ta haci zonido pa atrae e dori embra y tambe pa establece nan area di broei.
E dori embra ta laga e webonan hunto atras, manera un neishi scuma blanco, y e dori macho ta esun cu ta cuida e webonan te ora nan broei.
E dori chikito tin manera un rabo cortico ainda na nan curpa ora nan ta chikito. Dorinan ta habita den damnan y den tempo di secura nan ta sconde den suela y ta bolbe despues di yobida.
Nan ta come insecto, bichi y harañanan. E menasanan pa dorinan ta perdida di habitat door di polucion den damnan. Especienan di pisca introduci den damnan manera e ‘mosquito fish’ ta come tur e webonan di dori.
Antes muchanan tawata coy e dorinan chikito fo’i dam y hiba nan den bleki cas. Despues nan ta muri, y asina tambe e populacion di dori local a caba.
