Vocero di Aruba Food & Beverage Association --- ORANJESTAD (AAN): E sector di cuminda y bebida na Aruba ta genera rond di 6 mil puesto di trabao,
locual ta un cantidad basta halto. Mientras cu e industria aki logra keda su mes fuerte, c'un ambiente sano di trabao, e puestonan di trabao aki lo permanece y incluso lo por sigui crece, asina e vocero di Aruba Food & Beverage Association (AF&BA), Natalia Schoofs-Delegado a duna di conoce durante un entrevista cu DIARIO.
El a duna di conoce cu un di e misionnan di e asociacion ta promove practicanan sano pa loke ta salubridad, bioseguridad y standardnan di calidad. Esaki tambe ta trece cu ne cu e personanan ta sinti comodo di traha den e industria. Esaki ta un di e aportenan di e industria na e mercado laboral como tambe na e economia di e isla, a bisa.
Un otro aporte ta e educacion cu ta wordo brinda na e miembronan y na e staff.
"Nos tin como un mision grandi e parti di educacion. Nos ta kere cu esey ta e unico manera cu por adkiri un cierto nivel pa e negoshinan riba nan mes, pero pa cada persona cu ta traha cu nan. Ta un oportunidad di crecimento", Schoofs- Delgado, ken a asumi e posicion di PR na December ultimo na AF&BA a señala.
