ORANJESTAD (AAN): Despues di a haya un monton di declaracion di diferente persona cu nan a interoga, incluyendo informacion via di entrevistanan,
tur cos ta mustra cu LandsRecherche awor si tin suficiente prueba den man pa asina bay interoga Parlamentario Benny Sevinger di AVP, riba tur e forma robez y supuestamente ilegal cu procesonan den traspaso cu tereno di pueblo a bay den man di hende- y entidadnan priva, conoci como ‘Caso Avestruz’.
Como cu e investigadornan a mira cu tin di envolvi e casa di Benny Sevinger den e ronda di interogacion, a haci peticion riba Ministerio Publico pa por detene tur dos, esta Oslin Benito ‘Benny’ Sevinger di 56 aña di edad naci na Aruba, y su casa Claudia M. Sevinger-Castaño Henao di 47 aña di edad.
DETENCION NA COFFIESHOP:
Algun tempo pasa via un media mes a compronde cu a duna informacion cu rond di cas di Benny Sevinger na Paradijs, a instala un monton di camera High-Definition pa asina graba e tan spera dia di detencion, pa por ‘graba cara di tur oficial di LandsRecherche’.
Pesey mes ta parce cu Diaranson mainta nan no a acudi na e cas di ex-Ministro Sevinger pa detene. Pero a gare na un momento no-oportuno net ora e ta na un Coffieshop den De La Sallestraat na Playa, ta bebiendo coffie cu algun hende.
Oficialnan di LandsRecherche a yega eynan, y a informa Sevinger cu e ta deteni. Su casa tambe a wordo deteni.
Contrario na casonan anterior, e biaha aki e Parlamentario no a wordo hiba na sede di LandsRecherche den Vondellaan na Playa. Nan a hibe na un otro lugar mas safe pa asina e wordo someti na interogacion.
Observadornan tin e hipotesis, cu e detencion di Sevinger a socede awor, pa asina LandsRecherche por haci’e cierto pregunta, y mesora haci ‘cross-check’ cu e otro detenidonan cu ainda ta tras di trali, esta e locutora Leoncita Arends, e funcionario Franklyn Abath, y e comerciante Freddy Every. Ademas sigur lo bay mustra e Parlamentario riba contenido di loke nan a haya riba su computernan durante razzia teni na October 2019.
NET UN LUNA:
Mientras tanto, sostenedornan di Benny Sevinger a aglomera na su sede di campaña na e cruzada di Avenida Alo Tromp y Weststraat na Playa. Nan a splica cu deteni of no, nan ta sigui sostene y keda campaña pa e Parlamentario, cu awor ta na #29 riba lista di AVP.
Loke nan a cuestiona, ta di con net 1 luna prome cu e fecha di eleccion, cu oficialnan di LandsRecherche ta detene Benny Sevinger.
Nan a mustra, cu cuatro aña pasa tambe ora di eleccion di 2017, net 1 luna prome cu e fecha di basha bala cora, cu nan a detene tambe Paul Croes. Kizas e ta puro casualidad cu el a cay riba mesun periodo di tempo, pero e sostenedornan no ta kere esey. Nan ta mira tur esaki como un persecusion politico.
Sinembargo LandsRecherche ta trahando a base di documentonan y tur demas prueba cu nan tin.
MINISTERIO PUBLICO SU BANDA:
Diaranson mes, Ministerio Publico a duna un relato masha minusculo mes riba loke a socede. Nan a djis bisa cu LandsRecherche a detene e homber O.B.S., ex-Ministro di pais Aruba, relaciona cu e investigacion Avestruz, y debi na e investigacion, nan lo no por duna mas informacion pa awor.
Sinembargo Ministerio Publico a confirma si cu e casa di Benny Sevinger tambe a keda deteni Diaranson mainta.
