Alvin Molina di fraccion di MEP kier sa:
ORANJESTAD (AAN) -- “E edificio di ImSan so bal 72 miyon florin, anto esey ta sin ekipo. Kico lo pasa cu e edificio aki? Kico nos por spera; e edificio lo por wordo bendi, djis pa cubri e debenan di HOH?” ta preguntanan cu Parlamentario di fraccion di MEP, Alvin Molina, ta haci su mes, relaciona cu e posible fusion di ImSan y HOH.
El a agrega cu San Nicolas lo conoce un desaroyo economico hopi mas amplio ainda, si tene cuenta cu e area di turismo.
“Secrets Hotel lo wordo traha cu 600 camber. Serena Condominiums, Esso Club ta bin cu 40 condominiums. Hopi hende ta bin bishita e area aki, y sin menciona e hendenan cu ta bay traha den tur e condominiums y e hotel aki. Turismo medico cu tambe ta bay trece hopi mas movecion pariba di brug. Lo tin mas habitante pariba di brug, no solamente den e area di Colony, esey ta ‘so y so’, pero den San Nicolas completo. Tanto movecion extra, tanto hende cu ta frecuenta pariba di brug, mester por garantiza un bon cuido medico pa tur e hendenan aki. Deporte, ta bay aumenta pariba y mester tin siguranza medico pa esey tambe. Un hospital renombra tambe lo tin ‘spin up effect’, y esey lo atrae mas comercio pariba di brug. Cu otro palabra, si San Nicolas lo desaroya, Aruba lo desaroya!” Parlamentario Alvin Molina a enfatiza.
El a agrega cu si lo keda un servicio di eerste hulp pabao di brug so, habitantenan y turistanan di pariba di brug lo mester bay atrobe, te otro banda di Aruba, pa haya un servicio di laboratorio of di emergencia, y atrobe por mira cu pariba di brug ta e prome na cay bek atras. Pa finaliza, Molina a agrega un di cuater punto tocante e reunion cu, Diaranzon, Parlamento tabata tin cu gerencia di HOH y di mes nan tabata habri pa scucha nan banda di medaya, con nan ta kere cu un fusion entre ImSan y HOH lo beneficia Aruba y San Nicolas. “Pero, honestamente, locual cu mi sa caba riba esaki y locual nos a tende Diamars den Parlamento riba e tema aki, pa nan bin purba di kita ImSan for di nos, nan mester bin hopi bon!
