Presidente di Parlamento Raymond Kamperveen:
ORANJESTAD (AAN) – Presidente di Parlamento, señor Raymond Kamperveen, den un entrevista cu DIARIO, a menciona cu prome cos cu el a haci como presidente nobo di Staten, ta traha un cita cu Griffier.
Griffier a acerca su persona pa dune informacion di tur cos cu ta andando, tambe a dune e lista di reunionnan cu ta pendiente. Tambe el a combersa cu e trahadornan di Parlamento, pa nan sa specificamente kico ta nan parti di nan trabao, pa nan por asistie y e por asisti nan. Kamperveen a comenta cu el a verhuis tur su cosnan, pa set up eyden, loke a tuma su tempo.
El a cuminza combersa papia cu Griffier pa wak con nan ta wak con ta bay yama reunion, y el a bise cu tin un par di reunion pidi desde 2022 cu no a wordo yama ainda. Tin reunionnan cu ta pa leynan importante cu mester bin. Y tin reunionnan pa temanan cu ta importante pa cierto parlamentarionan, cu ta firma hunto pa yama e reunion.
Presidente di Parlamento a bisa cu door di esey e ta bay pasa aworaki, y pa e ta transparente y habri e lo mester comunica cu nan, pa wak si e tema ta valido ainda, si nan kier yama reunion of no, pa no bay perde tempo tampoco, pasobra e ta wak cu tin reunion cu e ta haya importante pa yama, y e tin cu duna e prome chens si ta oposicion of coalicion cu a manda yam’e y si mester pone fecha pa haci esaki tambe.
Presidente di Parlamento a menciona e leynan cu ta mas importante aworaki, cu ta: 1: e presupuesto supletorio 2024 su di dos parti, cu mester wak si awo cu gobierno ta demisionario lo tin cambio den esaki, cu por tin influencia riba e prome parti cu nan a trece dilanti caba. 2: E presupuesto 2025, pasobra manera Gobernador a bisa den su discurso, un Gobernacion ta un continuidad, y si ta na bienestar di Aruba, e gobierno cu tey aworaki mester sigui cu ne, y esun cu bin despues mester sigui cu e proyectonan cu tin cu wordo caba.
“Tur loke ta na bienestar di Aruba ta bon pa sigui, y loke ta cosnan cu ta bay cuminza aworaki, si tin cu warda”, Parlamentario y Presidente di Parlamento Raymond Kamperveen a declara.
Pa locual ta e reunionnan cu tin pendiente aworaki, Kamperveen ta haya cu tin un par cu ta al caso, manera esun di taxistanan pasobra e hendenan kier claridad riba esaki. Otro ta cu Minister Glenbert Croes; tambe esun di Husticia y un di SKOA cu e ta kere cu ta importante pa yama, pasobra pueblo kier sa mas di esakinan.
