Januari 19 1942, e U boat 156, submarino, comanda pa Capitan Teniente Hartenstein ta sali for di e bunker di Lorient Francia.
U 156 tabata forma parti di e grupo di 5 otro submarino U 67, U 129, U 161 y U 502. E grupo aki tabata conoci pa the “ Neuland Gruppe”.
Nan obhetivo principal: Termina transporte y refinamento di petroleo den Caribe Hulandes, Maracaibo y Trinidad den un atake masivo y coordina.
E submarino U-156 su mision tabata ataca Lago y tankeronan den cercania. E operacion tabata yama “ Bregenz”
E anochi di Februari 15 1942 U 156 ta acerca Lago y ta selecciona dos obhetivo. Lake Tanker SS Pedernales y SS Oranjestad.
E speransa cu guera no ta yega Aruba ta caba ora cu Februari 16 1942 pa 1:31 di madruga U -156 ta los su torpedo y ta dal Pedernales cu tabata carga cu azeta. Un explosion enorme ta socede y 8 marinero ta muri den e infierno.
Dos minuut despues 1:33 am un otro torpedo ta dal ss Oranjestad y ta pega candela net dilanti di Lago.
15 marinero ta perde nan bida.
U 156 ta prepara pa lansa su atake directo ariba Lago y ta lanta ariba awa y ta cla pa usa su cayon di 105 mm. E prome round di bala ta sali ta sosode un explosion. A lubida di saca e tapa for di e cañon.
Dos Aleman ta keda gravemente herida y un di nan ta fayece.
Apesar di e explosion aki, e Capitan tabata determina pa usa su otro arma di 37 mm y ta tira ariba Lago lagando Lago cu algun daño.
Hartenstein ta bandona su posicion y ta move Noord direccion Eagle.
Nunca Hartenstein no tabata sa cu den waf di Lago tabata tin e barco Henry Gibbons cu 3000 ton di TNT.
2:46 am y 3:00 am U 156 ta los dos torpedo ariba SS Arkansas cu tabata na e pier di Eagle.Tur dos torpedo ta faya y un ta yega ariba beach na Druif Beach.
Pa 3:13 U 156 ta los e ultimo torpedo y ta dal SS Arkansas.
SS Arkansas tabata bashi y e daño tabata minimo.
U 156 ta retira for di su posicion y ta move direccion Martinique
E Fokker FXVIII di Defensa Hulandes a sali for di Aeropuerto y a basha 18 liber ariba e submarino U 156 sin exito.
Mientras Aruba ta spanta di e atake di submarino ariba Lago y e explosion di e torpedo cu ta mata 4 persona; dilanti waf di Oranjestad e submarino U 502 ta lanta ariba superficie di lama. U 502 ta pega den seco pega cu rif.
Diferente persona y mucha ta core bay canto di lama pa wak e submarino.
E submarino U 502 ta libera su mes y ta huy pa Venezuela. Na caminda U 502 ta topa 3 lake tanker den Golfo di Venezuela. Mesora ta torpedea SS Tia Juana, SS San Nicolas y Monagas.
U 67 ta manda diferente torpedo ariba tankeronan den waf di Willemstad pero ta faya. Na ultimo ta logra destrui e tankero Rafaela.
Compila pa Roberto Croes
Nos Historia Nos Herencia
