Na un momento cu por ta crucial pa avance comunista den situacion mundial - E crisis di Covid-19 tabata habri porta den region pa e pensamento Comunista
ORANJESTAD(AAN)— Uno di e puntonan sumamente importante di e pandemia di Covid-1, tabata e forma cu e pensamento comunista a haya oportunidad di plama mundialmente.
E sistema comunista por a mantene su mes mas cu e sistema democratico debi na e hecho cu socialismo/comunismo ta directamente mara na dictadura den practica.
For di momento cu Covid-19 a presenta su mes, por a nota cu paisnan comunista tabata tin dificultad pa hunga carta abierta den e cantidad di casonan cu nan tabata registra y e resultadonan cu esaki tabata tin pa e pais.
E forma cu realmente a atende cu e pandemia na paisnan socialista y comunista, for di un principio a wordo cuestiona.
Den region di Aruba a resalta sigur e forma cu por ehemplo Venezuela tabata entrega informacion riba e forma cu e tabata atende cu e pandemia y e cantidad di victimanan cu el a exigi na Venezuela.
Cifranan di paisnan dictatorial na cual paisnan socialista y comunista ta pertenece semper a wordo considera dudoso y e forma cu realmente e pueblonan di e paisnan aki tabata haya asistencia di nan gobierno, tabata na duda.
Tin hopi aspecto di e forma cu e paisnan comunista y socialista a atende cu e pandemia, cu mester haya claridad ainda y hasta ta teme cu te awe no tin un bista apropia pa asina por huzga e realidad mundial.
E protestanan cu a surgi na Cuba mientrastanto pa e region di Caribe y America Latina a expone berdadnan cu normalmente ta keda scondi pa comunidad mundial.
E protestanan na Cuba a expone e realidad di comunismo, cu no ta basa riba e felicidad di e pueblo pero mas bien riba loke ta na interes di e estado, di e gobierno, cu ta mas eleva cu e necesidad di e ciudadanonan, di hende en general.
Durante e disturbionan, situacionnan cu hasta tabata wordo pinta na un forma romantico, ta haya un cara diferente.
E imagen di un Cuba cu autonan bieu di decada ochenta den un totalidad di casnan cu tabata parce di fantasia, awe ta papia mas bien di un pueblo cu no a conoce e avancenan social cu paisnan liber a conoce.
Cuba ta uno di e topiconan mas interesante actualmente di analistanan mientras Cuba ta trata na haci mundo kere cu ta e medidanan di Merca pa evita e asistencia militar di Cuba na Venezuela, a bira motibo di e caida di Cuba.
Informacionnan cu ta bini dilanti mas bien ta mustra, cu Cuba tabata incapaz pa duna su poblacion loke mester tabata tin pa por a enfrenta e pandemia riba tereno medico y tur otro tereno.
Cuba tabata probecha di un banda di comunismo pero na mes momento tabata dependiente di lazonan comercial cu mundo democratico caminda por a nota durante ultimo decadanan un flirteo entre Cuba y Europa por ehempel cu hasta a bini dilanti ora Merca a impone medidanan contra Cuba pa e sosten di e regimen comunista Cubano na Nicolas Maduro.
Covid-19 a cera pa parti importante di e lazo comercial entre Cuba y otro paisnan y asina a expone e dependencia di Cuba di paisnan democratico.
E situacion na Cuba por tin resultado importante den e periodo cu mundo mester recupera di Covid-19. E magia di comunismo a disparece sigur pa Cuba mescos cu pa otro paisnan comunista dictatorial, caminda ta keda demostra cu e hende no tin e balornan cu segun comunista e tin.
E fantasia di hende como figura central den comunismo, a bay perdi na Cuba, baluarte Ruso na e continente Mericano for di momentonan cu Rusia a cuminsa uza Cuba como su trampolin na continente Mericano.
Loke ta pasa awe na Cuba, segun expertonan tin resultado ideologico mientras cu mester mira ainda con Cuba ta bay recupera economicamente y kico e pais ta bay ofrece su aliadonan comercial democratico, cu sin duda segun expertonan internacional a sufri seriamente durante Covid-19 di e porta Cubano y di otro paisnan comunista, caminda dictadura a haci posibel cu trahado y hende loke ta imposibel cu trahado y hende na paisnan liber, democratico.
Den e situacion di Covid-19, e problemanan social ta crea tereno fertil pa pensamento socialista. Den e situacion di Covid-19 y Cuba e realidad ta keda expone.
