Rey Charles III y e mision pa dirigi mundo den e lucha contra cancer
- Mundo den lucha cu tanto angustia, ta ricibi e arma grandi den bida
- Splendor di soño Princesa Catherine a bira plataforma di reto universal
ORANJESTAD (AAN) Dia 8 di September 2022, Reino Uni y Commonwealth a tuma despedida di nan Reina Elisabeth II. Di e forma aki na Palacio Balmoral na Escocia, a yega un fin na e reinado di setenta aña di un Reina cu a skirbi su historia durante temporada cu retonan nobo a uni na restonan di loke historia a laga atras pa forma e demanda nobo di accion.
Ora papia di Reino y accion, generalmente pensamento ta bay den direccion di informacionnan sensacional cu por wordo produci of noticia cu ta splica entre otro condicionnan di guera y conflicto pa poder.
Generalmente, un Pueblo y mundo ta na haltura kende lo ta sucesor di un Monarca y no ta pone mucha duda na e persona cu lo ocupa e posicion.
Den caso di e sucesor oficial di Reina Elisabeth II, continuamente tabata tin duda, si e Principe Heredero, lo asumi trono.
E duracion di e Reino di Su Mahestad Elisabeth II, acopla na e forma cu bida di Principe Charles tabata wordo sigui dor di mundo den un tempo cu bida real a bira uno di e mihor productonan di benta di sesacion, a crea imagennan segun pensamento di publico pa Principe Charles y pronostico cu nunca e lo a bira Rey.
Na momento cu Reina Elisabeth II a despedi di e mundo aki, e hora di entrada di Rey Charles a bati na porta den un mundo, carga cu confusion, dolor, guera, incertidumbre.
Na e momento cu Reina Elisabeth II a fayece, Reino Uni a schrap e palabra Queen den su himno nacional y a cuminsa canta “God Save the King”, pa saluda e Rey nobo, cu hopi a pensa cu e lo bira Rey.
E yiu mayor di Rey Charles III di su prome matrimonio cu Princesa Diana, a bira Principe Heredero. E segundo esposa di Rey Charles III, Camila, a bira Reina.
Asuntonan hopi personal pero di importancia grandi cu a influencia pensamento di hopi hende, cu acopla na su edad pa bira Rey, a pensa cu e lo a entrega e encargo na Principe William.
Pero destino tabata tin un tarea special pa Su Mahestad Rey Charles, kende despues di morto di su mama, a presenta mundo un imagen cu a sorprende.
Hunto cu Reina Camila, mas y mas el a cuminsa duna contenido na e pensamento di ta Rey di un Pueblo.
Cu un seguridad enorme, cu hopi no a spera, el a duna su propio contenido na su funcion di Rey, adapta na exigencianan di e temponan moderno di tanto sufrimento humano.
Na momentonan di problema grandi di mundo, e figura di Reina Elisabeth II, tabata inspira pa e forsa cu e ta entrega den lucha den camponan di bataya militar.
Na 2024, destino a entrega na Rey Charles un lugar special den e lucha mas grandi cu mundo conoce, cu ta e lucha pa salud di hende.
Rey Charles a informa mundo, cu e ta sufri di cancer, e enemigo grandi di hende cu no conoce frontera. For di e momento, publico mundial a cuminsa realisa cu tin un Rey Charles cu nunca nan a spera. Un Rey cu por dirigi e bataya grandi di humanidad.
Su Mahestad Rey Charles III a crece den tragedia y a contesta e guera di hende contra cancer, cu e arma mas efectivo cu por tin, cu ta busca asistencia medico pero no entrega na e malesa.
No a tarda pa Princesa Catharine, esposa di e Principe Heredero William, anuncia cu e tambe ta sufri di cancer y cu e ta recupera pa despues sigui, a base di e guia profesional di mediconan nan, cu e terapia preventivo contra cancer.
Uno di e eventonan mas importante di Reino Uni, ta Trooping the Colour, e celebracion oficial di cumpleaños di un Rey.
E pais ta presenta su forza militar cu desfile di tropanan na pia y riba cabay mientras cu avionnan di guera ta crea un espectaculo.
Durante fin di siman, Su Mahestad Rey Charles di Inglatera, a presenta na mundo e imagen di un Rey, cu no ta entrega bataya na e enemigo di mas grandi di hende y hunto cu Princesa Catherine a participa na e evento magno.
Reino Uni y mundo henter, a keda presenta cu Rey Charles, cu a duna prueba cu e ta digno di ta Rey di Inglatera.
E enemigo grandi di hende, cu ta cancer, a haya un contesta Real, den e bataya cu ta wordo hiba dor di Rey Charles di Inglatera, cu hunto cu Princesa Catherine, ta anima pashentnan di tur edad y rond mundo, pa enfrenta e malesa y pa sigui lucha y no entrega spada.
Mundo a haya e contesta , pakico Rey Charles III mester a bira monarca pa asina atende cu e enemigo mas cruel di hende, cu ta cancer!
