Diadomingo 28 di Juli 2024 Venezuela ta bay supuesto urna electoral
*Kico ta e destino di un pais cu casi 8 Miyon ciudadano den exterior?
*Kico Nicolas Maduro lo ta sin e titulo di Presidente di Venezuela?
ORANJESTAD(AAN)—Cu 2024 lo a bira un aña carga cu acontecimentonan cu por wordo considera special, tabata loke por a spera a base di tur e desaroyonan cu mundo a conoce.
E siman aki uno di e informacionnan cu sigur a merece atencion tabata e hecho cu Presidente di Venezuela, of e persona cu a dicidi cu e lo ta Presidente di Venezuela, Nicolas Maduro, a haci cu hasta Presidente Lula di Brazil a mustra cu Nicolas Maduro mester respeta decision di Pueblo.
Pa hopi tempo no solamente paisnan pero union di paisnan y organisacionnan internacional manera Union Europeo, a trata na mustra Nicolas Maduro cu e forma cu el a bira y a keda Presidente di Venezuela, no ta segun normalidad democratico.
Venezuela hasta a conoce un Presidente pafor di Venezuela, cu despues a cay den olvido y cu mundo a lubida cu e tabata existi.
A yega e momento pa Venezuela bolbe urna electoral.
Un frase cu ta sona sumamente democratico pero cu na nos parecer, den e totalidad di weganan politico di Nicolas Maduro, cu tin un gran motibo pa no kier tende di eleccionnan bon organisa, cu tin tur probabilidad pa manda su persona cas, sigur si tur e Venezolano cu pa su motibo a bandona nan pais, bay urna electoral.
Ta hustamente e hecho cu un eleccion limpi lo nifica problema serio pa Nicolas Maduro, ta motibo cu mester puntra con serio e eleccionnan Venezolano di Diadomingo mester wordo tuma.
Pa sorpresa grandi, un persona cu den e ultimo dianan aki a acerca Nicolas Maduro y a mustra Maduro cu e mester respeta eleccion, tabata Presidente di Brazil, Lula, cu ta un sorpresa mayor.
E hecho cu Presidente Lula ta pidi Nicolas Maduro respeta eleccion y no causa e baño di sanger cu segun informacionnan Nicolas Maduro lo a anuncia si e perde eleccion, a haci nos comprende cu e situacion mester ta basta serio.
Sin duda algun esaki ta un hecho ya cu ainda Nicolas Maduro kier anuncia Guyana pa asina amplia su teritorio loke lo tin resultado pa Brazil y otro paisnan den e region tambe.
Na e momento cu Lula a bay pidi Nicolas Maduro pa tene su mes na regla, nos a comprende con grandi e shock regional ta, cu Nicolas Maduro por keda na poder na Venezuela, pasobra Lula tambe tin su historia como dirigente politico socialista.
Lula ta reconoci como un izquierdista y durante ultimo temponan hasta por papia di un tipo di “primo hermano” den relacion entre Maduro y Lula, cu por dicta catedra den berdad socialista.
Pues e hecho cu Lula a bay pidi Nicolas Maduro pa tene su mes na regla, y bay cas si Pueblo dicidi cu Nicolas Maduro mester bay cas, tin un nificacion sumamente special mas ainda cu Lula a bay na careda cerca Nicolas Maduro despues cu Maduro a papia di un espectaculo sumamente sangriente cu por presenta su mes na Venezuela si e perde eleccion.
Mientrastanto e pregunta grandi ta keda, ta con tur hende cu ta contra Maduro ta haci vota pa Maduro bay cas.
Di e casi 8 Miyon Venezolano den exterior, aparentemente alrededor di 70 Mil so lo por haci uzo di nan derecho di voto.
Kico lo pasa cu e resto?
Pregunta tras pregunta den un inseguridad regional, cu ta haci cu e hecho cu e frontera entre Venezuela y Aruba ainda ta cera, ta un alivio sigur pa Aruba.
Pa loke ta trata Nicolas Maduro, tanto Lula como resto di mundo cu ta biba cu e speransa cu e lo respeta eleccion mester comprende, cu Nicolas Maduro no ta nada si e no tin e titulo di Presidente di Venezuela.
Pa Nicolas Maduro fiesta di bida y bida di fiesta a caba na momento cu eleccionnan manda su persona cas y e di berdad respeta democracia, manera awor aparentemente Lula di Brazil cu un historia largo su tras tambe, ta haci.
Pa Nicolas Maduro no tin futuro tras di un horizonte sin e poder di Presidente di Venezuela cu a entrega na su persona un poder mundial cu dia cu el a nace y te e momento cu el a bira Presidente, hamas el a pensa cu e por tin pa lamento di tur cu a bira su victima y di un Venezuela cu el a destrui!
Lula mester conoce e berdad aki mescos cu e berdad di Lula ayera!
