Cristina Rademaker, di AZV:
*El a mira un espacio den e fondo di AZV y no a duda pa haci e inversion
ORANJESTAD (AAN) – Señora, mr. Cristina Rademaker, di AZV, a hiba palabra den representacion di Ir. Edwin Jacobs, Director, ken ta den exterior, durante e entrega di cuater ambulance nobo pa ImSan.
Señora Cristina Rademaker a disculpa Ir. Jacobs, cu ta di viahe pa graduacion di su yiu. E dama a expresa cu si no tabata pa e motibo aki señor Jacobs sigur lo tabata presente na e momento aki, cu gran satisfaccion.
Rademaker a señala cu e proyecto di inversion aki, den e cuater ambulancenan ta un proyecto cu señor Jacobs a esforza su mes pa wak’e bira realidad.
“Na momento cu el a mira un espacio financiero den e fondo di AZV, e no a duda den coordina Ministerio y Minister pa por a haci e inversion aki posible.
Ambulance ta hunga un rol hopi importante den e bida na Aruba. Y cu un servicio di ambulance profesional y cu ekiponan moderno por salba un bida. Na AZV, nos ta kere firmemente cu e inversionnan corecto den cuido, nos por fortifica e cuido pa nos comunidad. Y p’esey, hunto cu Ministerio, cu Minister y cu nos stakeholders, nos lo sigui haci e inversionnan necesario den cuido na Aruba.
Dr. Rajnherc, empleadonan di ImSan, pabien cu boso ambulancenan. Nan ta mustra hopi bunita; mi ta spera ningun hende nunca mester haci uzo di nan, pero ta bon cu nan t’ey, si. Na Minister, danki pa apoya nos semper, y na full e team di AZV completo, danki na tur cu a aporta pa e proyecto aki por a bira realidad. Na personal di Ambulance mi kier a duna un danki pa boso trabao di tur dia. Esaki ta esencial den cuido, pa boso percura pa e pashentnan por yega na e cuido cu nan mester, den situacionnan hopi fastioso. Danki pa boso trabao di tur dia, y sigui bay dilanti pa tur hende yega na e cuido cu nan mester”, señora mr. Cristina Rademaker a bisa pa conclui.
