Dahariana Evertsz, Health Promotion:
ORANJESTAD (AAN) — Biniendo bek na e tema di obesidad, Dahariana Evertsz, funcionario di Departamento di Salud (DVG), encarga cu Promocion di Salud, a comenta cu esaki ta resalta mas tanto den hendenan jong. Esaki ta basa riba e resultadonan di Rapport di STEPS.
“Si nos ta pone esaki den un capa mas grandi, di 18 aña te 45, esey ta e cifranan cu nos mester tin mas cuenta na dje. El a splica cu e encuesta STEPS ta haci pa Pan American Health Organization, pues nan mester cu preguntanan specifico, nan mester pone e edadnan cu mester wordo entrevista, y e ta cuminza cu 18 te 69 aña. Docternan a puntra nos di con nos no a bay pa edadnan mas grandi, of nos no a hacie pa hendenan mas jong, pero pregunanan y midimento cu mester a bay haci pa hobennan y mucha ta full diferente, na esnan cu bo tin cu haci pa hendenan grandi. Pero si nos sa cu di seccion hubenil di DVG tin otro tipo di encuesta cu nan ta bay haci pa muchanan tambe. Pues, nos ta zorg pa ta bezig cu otro aspectonan”, Dahariana a señala.
“Nos ta desea di baha e cifranan di obesidad den e siguiente dos añanan pa ora cu nos haci STEPS, e siguiente ta na aña 2028, nos kier wak un reduccion den e parti di obesidad, consumo di alcohol y sigur den e parti di vaping”, Dahariana Evertsz a indica. Hipertension ta otro situacion cu Prevencion di Salud ta tene na cuenta, y cu nan sa cu por traha riba dje mas facilmente, pero esnan cu ta mas alarmante y cu tin mester di nan atencion ta e tresnan aki: bebemento excesivo di alcohol, vaping y obesidad.
Dahariana a menciona cu ora nan a haci e presentacion di STEPS algun docter di cas, POH's, specialista y representantenan di hospital tabata presente. “Nos tabata contento cu nan tabata tey y cu e preguntanan cu nan a haci y cu nan tabata kier haya e rapport. Hopi di nan a ricibi esaki caba”, señora Evertsz a indica.
El a subraya cu semper e prome contacto cu e personanan mester bay cerca dje ta docter di cas. Apart cu DVG kier pa e pueblo lesa e rapport, nan kier pa e personanan bay cerca e docter di cas, kizas tin cierto cosnan cu nan lo kier aborda, por ehemplo salud mental di cual tambe tabata tin preguntanan den sala. Nos kier pa e personanan cuminza cu e prome persona di contacto, y si tin algo cu mester referi na un specialista, nan docter di cas nan tin cu cuminza”, Dahariana Evertsz, a remarca.
