Jurette Croes, Relacionista Publico DVG:
ORANJESTAD (AAN) Den entrevista cu Matutino DIARIO, señora Jurette Croes, a splica tambe cu pa tuma e vacuna contra influenza tin un servicio special tambe, pa personanan cu ta riba cama y no por sali.
“Pa nan nos tin un team cu ta bishita cas. Pa e servicio aki e personanan mester yama e number principal di Departamento di Salud Publico, cu ta 522-4200, y eynan ta haci un afspraak pa e team por bishita e pashent na su cas. Y tambe nos tin un servicio special pa esnan cu ta inmovil riba rolstoel, pa nan no tin cu baha bay paden. E familiar of e persona cu ta bin cu ne por bin akinan, baha y haci e tramite cu un testigo paden, y e ora ey un enfermera ta sali y vacuna e persona den auto. Esey tambe ta un posibilidad”, Jurette Croes a duna di conoce.
Vacunacion den bario: Jurette Croes a agrega cu tambe ta bay tin vacunacion den bario, manera ta e caso tur aña. E prome stacion lo ta dia 5 di November, pues Diaranzon awo, na ImSan, San Nicolas, paden di e centro medico mes. Habitantenan di Cura Cabay por yega na ImSan pa vacuna, e ta di 1’or pa 3’or di atardi.
Tambe nan ta bay ta diahuebs 13 di November na Stadion Frans Figaroa, mainta di 8’or pa 11’or, Diahuebs 20 di November na Centro di Bario Playa Pabao, mainta di 8’or pa 11’or, y Diahuebs 27, Sport Hall Santa Cruz di 8’or pa 11’or.
